Nərimanov rayonu üzrə “Məktəb hesabatları” dinlənilib
Bakı, 23 iyun, AZƏRTAC
İyunun 23-də “Məktəb hesabatları”nın dinlənilməsi Nərimanov rayonu üzrə keçirilib.
Bu barədə AZƏRTAC-a Bakı Şəhəri üzrə Təhsil İdarəsindən (BŞTİ) məlumat verilib. Bildirilib ki, paytaxtdakı Məktəb-Lisey Kompleksində təşkil olunmuş dinləmədə çıxış edən BŞTİ-nin müdiri Mehriban Vəliyeva məktəb mühiti, ümumi təhsil pilləsində təhvilverənlərin keyfiyyət göstəriciləri, hesabatlılıq, təhsil müəssisələrinin fəaliyyətində iştirak edən hər bir kollektiv üzvünün qarşılıqlı hesabatvermə yolu ilə tapşırılmış işə cavabdehliyi və vəzifə məsuliyyəti, zəruri hallarda idarəetmə sistemində müvafiq dəyişikliklərin aparılması kimi məsələlərə dair fikirlərini bildirib.
Mehriban Vəliyeva “2020-2021-ci tədris ilində ümumi təhsillə bağlı aktual məsələlər və hədəflər barədə” təhsil nazirinin əmrində müəyyən edilmiş əsas prioritet istiqamətlər üzrə görülən işlərdən, Azərbaycan Respublikasında ümumi təhsilin dövlət standartları sənədində qarşıya qoyulmuş idarəetmə prinsiplərindən, təhsil sahəsində aparılan islahatlardan, paytaxt təhsilinin inkişafı istiqamətində əldə olunan uğurlardan və qarşıda duran vəzifələrdən bəhs edib.
BŞTİ-nin müdiri məktəb direktorlarının səmərəli idarəetmənin təşkili baxımından üzərinə düşən vəzifələr və müasir dövrün tələblərinə uyğun tədrisin təşkili təcrübəsinə yiyələnməsinin vacibliyi məsələlərini nəzərə çatdırıb. O, məktəbin hərtərəfli inkişafı və tədris göstəricilərinin yaxşılaşdırılması məqsədilə təsirli tədbirlərin görülməsinin əhəmiyyətindən danışıb, inkişafetdirici layihələrin nəticələrinin təhlilinə xüsusi diqqət yetirilməsini önə çəkib.
M.Vəliyeva tədris ilinin sonunda fəaliyyətə dair təhlilin aparılmasının perspektiv addımların seçilməsi, növbəti tədris ilində qarşıda duran vəzifələrin müəyyənləşdirilməsi baxımından olduqca mühüm əhəmiyyət kəsb etdiyini bildirib.
Məktəb direktorlarının hesabatları dinlənildikdən sonra Keyfiyyətə nəzarət sektorunun müdiri Anar Mustafazadə Nərimanov rayonu üzrə ümumi təhsil məktəblərinin tədris göstəricilərinin təhlilinə və IV, VIII, IX siniflərdə keçirilən monitorinq imtahanları, buraxılış imtahanlarının nəticələrinə dair təqdimatla çıxış edib. Təlimə Dəstək Mərkəzinin direktoru İlkin Həsənov “Məktəbdə idarəetmə və pedaqoji işin təşkili ilə bağlı ehtiyaclar və tövsiyələr” mövzusunda təlim keçib.
Müzakirələrdə ümumi təhsil məktəblərində təmayülləşmə, keyfiyyətə nəzarət işi, təlim keyfiyyətinin artırılması istiqamətində səmərəli yanaşmalar, keyfiyyətin artırılması üsul və formaları, təminat-təchizat, məktəblərdə valideyn-şagird-məktəb əlaqələri, tərbiyə işinin təşkili, təhsil müəssisələrinin həyatındakı yeniliklərin ictimaiyyətə daha operativ çatdırılmasının təmin olunması və digər müvafiq mövzularda fikirlər dinlənilib, maraq doğuran məsələlərə dair suallar cavablandırılıb.
Qeyd edək ki, “Məktəb hesabatları”nın dinlənilməsinin əsas məqsədi ümumi təhsil məktəblərində təlim-tərbiyə prosesinin təşkili, ümumi təhsilin keyfiyyətinə birbaşa təsir göstərən metodiki işin düzgün qurulması, məktəblərin fəaliyyətində səmərəli idarəetmənin rolunun artırılması, məktəblərdə sağlam və yaradıcı mühitin təmin olunması üçün sistemli işin aparılması, müəllimlərin peşəkarlıq səviyyəsinin yüksəldilməsi, sağlam rəqabətin yaranması, istedadlı şagirdlərlə işin düzgün qurulması və olimpiada hərəkatının genişləndirilməsi, uşaqların məktəbəhazırlıq təhsilinin genişləndirilməsi, tam orta təhsil səviyyəsində təmayülləşmənin tətbiqi, digər müvafiq məsələlərin müzakirəsi və təhsil müəssisələrində tədrisin keyfiyyətcə yeni mərhələyə qədəm qoymasını təmin etməkdir.
“Məktəb hesabatları” üzrə dinləmələr paytaxtın 12 inzibati rayonu üzrə keçiriləcək.
Bölmənin digər xəbərləri
