SİYASƏT
Niderlandda ermənilərin Azərbaycan diasporuna qarşı növbəti fitnəkarlığı
Paris, 31 dekabr ( AZƏRTAC ). Əsas mənzil- qərargahı Amsterdam şəhərində yerləşən Benilüks Azərbaycanlıları Konqresinin (BAK) mətbuat xidmətindən AZƏRTAC-a bildirmişlər ki, Hiderland Krallığında məskunlaşmış ermənilər bu ölkədə fəaliyyət göstərən Benilüks Azərbaycanlıları Konqresinə qarşı növbəti fitnəkarlığa əl atmışlar. Onlar dekabrın 29-dan 30-na keçən gecə konqresin Rotterdam şəhərindəki ofisinə basqın etmiş, ofisin qiriş və sədrin otağının qapılarını sındırmış, BAK-a məxsus texniki avadanlığı-kompyuter, monitor, səsgücləndirici aparat və digər əşyaları aparmışlar. Bununla kifayətlənməyən gecə basqınçıları ofisdə Azərbaycan bayrağı ilə bir yerdə bərkidilmiş qardaş Türkiyənin bayrağını yerindən çıxarmış, parca-parca edərək yararsız hala salmışlar.
BAK-ın rəsmlərinin müraciətinə əsasən Rotterdam şəhər və regional polisi hadisə yerinə gələrək tədqiqata başlamışdır.
Dünya Azərbaycanlılarının Həmrəylik Gününün bayram edildiyi bir vaxtda ermənilərin fitnəkarlığa əl atmaları heç də təsadüfü xarakter daşımır. Ermənilər, onların ölkəmizə qarşı fitnəkar və düşməncəsinə hərəkətlərini dəfələrlə ifşa etmiş BAK-nin fəal və mübariz üzvlərini qorxutmağa, Ermənistanın Azərbaycana qarşı apardığı işğalçılıq siyasətini yerli əhaliyə çatdırmaq cəhdlərindən çəkindirməyə çalışmışlar. Lakin onların belə fitnəkarlıqları hər dəfə BAK tərəfindən ifşa olunmuş, yerli ictimaiyyət erməni saxtakarlığı barədə xəbərdar edilmişdir. Ermənilər birdəfəlik anlamalıdırlar ki, belə hərəkətlərlə özlərinin iç üzlərini açıq-aydın göstərirlər və onlar xarici ölkələrdə yaşayan azərbaycanlıları haqq yolundan çəkindirə bilməyəcəklər.
Niderlandda yaşamalarına baxmayaraq, Vətən hissini hər şeydən üstün tutan və azərbaycanlıları ətrafında birləşdirmiş Benilüks Azərbaycanlıları Konqresi ermənilərin Azərbaycana qarşı apardığı işğalçılıq siyasətini, onun təzahürlərini, ermənilərin məkrli simalarını daima ifşa edən fəaliyyətini heç nəyə baxmadan bundan sonra da inamla davam etdirəcək, doğma Azərbaycan ətrafında daha sıx birlik nümayiş etdirəcəkdir.
Əsgər Əliyev
AZƏRTAC-ın xüsusi müxbiri
Paris