Odessada Azərbaycan xalqının ümummilli lideri Heydər Əliyevə abidə ucaldılması planlaşdırılır
Bakı, 7 iyul (AZƏRTAC). Odessada Azərbaycan xalqının ümummilli lideri Heydər Əliyevə abidə ucaldılması planlaşdırılır.
AZƏRTAC xəbər verir ki, layihə müəllifi memar Vladimir Qlazırin, heykəltəraş Aleksandr Tokarev olan abidəni 4-cü Böyük Fəvvarə stansiyasındakı bağda ucaltmaq nəzərdə tutulur. Odessa şəhərinin baş memarı Boris Brovin bu barədə memarlıq və şəhərsalma bələdiyyə idarəsi yanında şəhərsalma şurasının iyulun 7-də keçirilmiş iclasında məlumat vermişdir.
B.Brovinin sözlərinə görə, bu abidənin ucaldılması barədə xahişlə Azərbaycanın Ukraynadakı səfirliyi müraciət etmişdir.
Bağın ərazisi 2 hektar, abidə üçün ayrılan sahənin ərazisi isə 0,2 hektardır. Bağın Şərq üslubunda abadlaşdırılması, orada 2 fəvvarə və 2 hovuz tikilməsi, həmçinin qırmızı qranitdən hazırlanmış torşerlər qoyulması nəzərdə tutulur. B.Brovin bu bağın yenidən qurulması layihəsinə yaxınlıqdakı yolların abadlaşdırılması ilə əlaqədar işlərin də daxil olunmasını təklif etmişdir.
Bölmənin digər xəbərləri
