Oğuz Meşə Mühafizəsi və Bərpası Müəssisəsinin direktoru işdən çıxarılıb
Bakı, 20 noyabr, AZƏRTAC
Ekologiya və Təbii Sərvətlər Nazirliyinə daxil olmuş şikayət əsasında Oğuz Meşə Mühafizəsi və Bərpası Müəssisəsində araşdırma aparılıb.
Nazirliyin mətbuat xidmətindən AZƏRTAC-a verilən məlumata görə, araşdırma zamanı müəssisədə meşələrin qorunub mühafizə olunmasında ciddi qanun pozuntularına, qanunsuz qırıntılara yol verildiyi müəyyən edilib. Meşələrin qorunub mühafizə olunmasını qeyri-qənaətbəxş təşkil edərək əmək müqaviləsi üzrə öhdəliklərini yerinə yetirmədiyinə, habelə iş fəaliyyətinin qeyri-qənaətbəxş təşkilinə, işçilərin fəaliyyətinə nəzarəti lazımi səviyyədə həyata keçirmədiyinə, xidməti ərazidə ekoloji qanunvericiliyin tələblərinin pozulmasına görə Oğuz Meşə Mühafizəsi və Bərpası Müəssisəsinin direktoru Vüqar Mehdiyev işdən azad edilərək onunla bağlanmış əmək müqaviləsinə xitam verilib.
Yol verilmiş qanun pozuntularına görə cavabdeh olan digər işçilər barəsində də qanunamüvafiq qaydada ciddi intizam tənbehi tədbirləri görülüb. Tədbir görülməsi üçün araşdırma materialları hüquq mühafizə orqanlarına göndərilib.
Bölmənin digər xəbərləri
