AZƏRTAC xəbər verir ki, qarşıdakı Afina Olimpiadasında iştirak etmək üçün Azərbaycanın olimpiya lisenziyalarının sayı 38-ə çatmışdır. Gənclər, idman və turizm nazirinin müavini Asif Əsgərov jurnalistlərə bu barədə məlumat verərək demişdir ki, Beynəlxalq Atletika Federasiyasının qərarı ilə ölkəmizin daha iki yüngül atletinə lisenziya ayrılmışdır.

O, nazirliyin qarşıdakı 10 illik yubileyindən danışaraq qeyd etmişdir ki, nazirlik bütün siyasi fəaliyyəti ərzində gənclərin problemlərinə, idmanın inkişafına böyük diqqət yetirən ümummilli liderimiz Heydər Əliyevin təşəbbüsü ilə yaradılmışdır. Nazirliyin mövcud olduğu dövrdə idmançılarımız dünya və Avropa çempionatlarında müxtəlif dəyərli 1399 medal qazanmışlar.

Asif Əsgərov, həmçinin bildirmişdir ki, olimpiyaçıların ilk dəstəsi Afinaya avqustun 8-də, ikinci dəstəsi isə ayın 21-də yola düşəcəkdir.