Ordumuz düşmənin istənilən təxribatının qarşısını almağa hər an hazır və qadirdir - Açıqlama
Bakı, 14 iyul, AZƏRTAC
Ermənistan silahlı qüvvələri bölmələrinin Qarakilsə, Basarkeçər, Gorus və digər rayonların yaşayış məntəqələrindən, eləcə də Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni silahlı dəstələr tərəfindən ordumuzun həmin istiqamətlərdə yerləşən mövqelərinin müxtəlif çaplı atıcı silahlardan atəşə tutulmasının, mövqelərimizin qarşısında uzunmüddətli fortifikasiya qurğularını quraşdırmağa cəhd göstərməsinin dəfələrlə şahidi oldum. Qeyd olunan istiqamətlərdə Vətən müharibəsində qazandığımız möhtəşəm Zəfərin yaratdığı qələbə əhval-ruhiyyəsi ilə xidmətini davam etdirən igid əsgərlərimiz tərəfindən görülən təxirəsalınmaz tədbirlər nəticəsində düşmən anında və qətiyyətlə susduruldu, fortifikasiya qurğularını quraşdırmağa cəhdin qarşısı cəsarətlə alındı.
Bunu AZƏRTAC-a açıqlamasında Laçın, Kəlbəcər, Ağdam və Suqovuşana xidməti ezamiyyətdən yenicə qayıdan polkovnik Abdulla Qurbani deyib: “Prezident İlham Əliyevin 26 İyun - Silahlı Qüvvələr Günü ərəfəsində hərbi qulluqçuların bir qrupunu təltif etməsi, çıxış və nitqlərində Azərbaycan əsgərinin xidmətlərini həmişə yüksək qiymətləndirməsi, hərbi qulluqçular üçün ən müasir xidməti şəraitin yaradılması, onların sosial problemlərinin həlli istiqamətində davamlı olaraq tədbirlərin görülməsi, hərbi hissələrin maddi-texniki təchizatının gündən-günə möhkəmləndirilməsi Vətən müdafiəçilərinin döyüş ruhunu daha da artırıb.
Müdafiə Nazirliyinin rəhbərliyi tez-tez işğaldan azad edilən bölgələrdə dislokasiya olunan hərbi hissələrdə olur, döyüşü idarəetmə mərkəzlərində idarə heyətləri ilə görüşür, əməliyyat şəraiti barədə məruzələri dinləyir, ölkə rəhbərliyinin qarşıya qoyduğu əmr və göstərişlərin yüksək səviyyədə yerinə yetirməsi üçün bütün imkan tədbirlərindən səmərəli istifadə edir.
Şəxsi heyətin mənəvi-psixoloji hazırlığı, onların döyüş ruhunun, vətənpərvərlik hissinin daha da yüksəldilməsi daim diqqət mərkəzindədir.
“Ayrı-ayrı hərbi hissələrdə oldum, şəxsi heyətlə görüşlər keçirdim, həm kompleks, həm də fərdi qaydada söhbətlər apardım. Yataqxana, yeməkxana, göstərilən tibbi xidmətlə yerindəcə maraqlandım. Hər şey ürəkaçandır.
Vətən müdafiəçiləri yaxşı bilirlər ki, Azərbaycan rəhbərliyinin beynəlxalq hüquqa əsaslanan sülh danışıqları ilə bağlı apardığı aydın və məntiqli siyasət, bu danışıqlar nəticəsində müsbətə doğru hərəkət, Ermənistanın Qarabağ və anklav kəndlər də daxil olmaqla Azərbaycanın ərazi bütövlüyünü, suverenliyini tanıması, sərhədlərini qəbul etməsi gərgin fəaliyyətin nəticəsidir. Azərbaycanın ardıcıl prinsipial siyasi xətti, təzyiqləri Ermənistanın siyasi-hərbi rəhbərliyini buna məcbur etmişdir. Döyüşçülərimiz bütün deyilənlərə rəğmən məkrli, hiyləgər, riyakar düşmənin qarşısında dayandıqlarını da heç vaxt unutmurlar. Peşəkarlıqlarını durmadan artırır, ehtiyatlarını əldən vermir, ayıq-sayıqlıqlarını itirmirlər.
Döyüşçülərimizi düşündürən əsas məsələ şəhadətləri ilə tarix yazan, adları tarixə yazılan şəhidlərimizin, müharibədə sağlamlığını itirən igidlərimizin qanları bahasına işğaldan azad edilən şəhər və kəndlərimizdə geniş vüsət almış quruculuq işlərinin tezliklə başa çatması, Zəngəzur dəhlizi və digər möhtəşəm layihələrin reallaşması, əlbəttə, Ermənistanın sülh sazişini imzalaması məsələsidir. Hərbçilərimiz onu da yaxşı bilirlər ki, Ermənistan sülh sazişini imzalasa belə, təxribatlarından heç vaxt əl çəkməyəcəklər. Odur ki, güclərini, peşəkarlıqlarını daha da artırır, ayıq-sayıqlıqlarını heç vaxt itirmirlər. Xalqımız əmin ola bilər ki, bu gün Vətən müharibəsində qəhrəmanlıq və peşəkarlıq göstərmiş Azərbaycan Ordusundan daha da güclü Ordumuz var”, - polkovnik Abdulla Qurbani deyib.
Bölmənin digər xəbərləri
