Ötən il dövlət qulluğuna qəbul üzrə imtahan və müsahibələrdə uğur qazananların statistikası açıqlanıb
Bakı, 23 iyun, AZƏRTAC
Mərkəz tərəfindən 2020-ci il ərzində ölkədə hökm sürən pandemiya ilə əlaqədar dövlət qulluğuna qəbul üçün A növü - inzibati rəhbər (idarəetmə) vəzifələr üzrə (AA, AB və AC vəzifə qruplarına uyğun) 3 və B növü - inzibati icraçı vəzifələr üzrə (BA və BB vəzifə qruplarına uyğun) 3, cəmi 6 test imtahanı keçirilib. Test imtahanlarında iştirak etmiş 3530 namizəddən 1551-i (43,9 faiz) müvəffəqiyyət qazanaraq sertifikat əldə etmək hüququ qazanıb.
AZƏRTAC xəbər verir ki, bunu Dövlət İmtahan Mərkəzi Direktorlar Şurasının sədri Məleykə Abbaszadə deyib. M.Abbaszadə bildirib ki, namizədlər daha çox BB vəzifə qrupu üzrə (1212 sayda) uğur əldə edib. Bu qrup üzrə uğur qazananlar arasında qadınlar üstünlük təşkil edir. İmtahanda iştirak edən namizədlər arasında AA vəzifə qrupu üzrə uğur göstəricisi 10 faiz, AB vəzifə qrupu üzrə 5,6 faiz, AC vəzifə qrupu üzrə 31,8 faiz, BA vəzifə qrupu üzrə 33,6 faiz və BB vəzifə qrupu üzrə 49,3 faiz olub.
Dövlət qulluğuna qəbul üçün A növü - inzibati rəhbər vəzifələr üzrə test imtahanlarında iştirak edən namizədlər arasında dövlət qulluqçuları uğur göstəricisinə görə üstünlük təşkil edir. Belə ki, hesabat dövrü ərzində test imtahanlarında iştirak edən 32 dövlət qulluqçusundan 18-i (56,25 faiz) imtahanda müvəffəqiyyət qazanıb. Dövlət orqanlarında müddətli əmək müqaviləsi əsasında çalışan və test imtahanlarında iştirak edən 50 namizəddən cəmi 8-i (16 faiz) sertifikat almaq üçün müəyyən edilmiş keçid balını toplayıb. Test imtahanlarında iştirak edən digər kateqoriyaya aid 93 namizəddən 25-i (26,88 faiz) uğurlu nəticə göstərib.
Dövlət qulluğuna qəbul üçün B növü - inzibati icraçı vəzifələr üzrə test imtahanlarında iştirak edən namizədlər arasında da dövlət qulluqçuları uğur göstəricisinə görə üstünlük təşkil edir. Belə ki, hesabat dövrü ərzində həmin kateqoriyaya aid test imtahanlarında iştirak edən 159 namizəddən 82-si (51,57 faiz) imtahanda müvəffəqiyyət qazanıb. Dövlət orqanlarında müddətli əmək müqaviləsi əsasında çalışanlar B növü üzrə test imtahanlarında ən aşağı nəticəni göstərmiş, imtahanda iştirak edən 297 namizəddən yalnız 101-i (34 faiz) sertifikat almaq üçün müəyyən edilmiş keçid balını toplayıb. Dövlət orqanlarında çalışmayan namizədlərin isə uğur göstəricisi dövlət qulluqçularının göstəricisinə yaxın olmuş və 51.28 faiz təşkil edib.
Dövlət qulluğuna qəbul üzrə keçirilən test imtahanlarında iştirak edən namizədlər arasında uğur göstəricisinə görə dövlət qulluqçularının ən yüksək nəticəni göstərməsini bu kateqoriyadan olan şəxslərin dövlət orqanlarında çalışması, eyni zamanda, imtahanlara hazırlıq səviyyəsinin yüksək olması ilə əlaqələndirilməlidir.
Bölmənin digər xəbərləri
