Pakistanlı ekspert: Azərbaycan qlobal həmrəyliyə və əməkdaşlığa sadiqliyini nümayiş etdirir
Bakı, 7 iyul, AZƏRTAC
Azərbaycanın paytaxtı Bakıda keçirilən Qoşulmama Hərəkatının Əlaqələndirmə Bürosunun nazirlər görüşü canlı yayımlandığı üçün bütün dünya bu mühüm beynəlxalq əməkdaşlıq və həmrəyliyi özündə əks etdirən əlamətdar hadisənin şahidi oldu. Azərbaycan Prezidenti və Qoşulmama Hərəkatının sədri İlham Əliyevin tədbirdəki çıxışını böyük ruh yüksəkliyi və qürurla izlədik. Prezident İlham Əliyev Azərbaycanın Qoşulmama Hərəkatında müstəsna rolunu və aktual qlobal çağırışların həllində fədakarlığını vurğulayan təsirli nitq söylədi.
Bu fikirləri AZƏRTAC-a açıqlamasında Pakistan-Azərbaycan Məzunları Birliyinin qurucusu, strateji kommunikasiyalar üzrə pakistanlı ekspert Qayser Nəvvab söyləyib.
O bildirib ki, Azərbaycanın təşkilata uğurlu sədrliyinin nəticəsində səlahiyyət müddəti yekdilliklə bir il də artırılmışdı. Ötən müddət ərzində Azərbaycan ədalətə, beynəlxalq hüquqa və Qoşulmama Hərəkatına üzv dövlətlərin qanuni maraqlarının Bandunq prinsiplərinə uyğun müdafiəsinə sarsılmaz sadiqliyini nümayiş etdirib. Azərbaycan Qoşulmama Hərəkatının COVID-19 ilə mübarizəyə həsr edilən onlayn sammiti və BMT Baş Assambleyasının xüsusi sessiyası vasitəsilə qlobal səyləri effektiv şəkildə birləşdirərək, COVID-19 pandemiyası dövründə təzahür edən fəsadlara qarşı mübarizədə mühüm rol oynayıb. Bundan əlavə, Azərbaycan rəhbərliyi müvafiq olaraq Qoşulmama Hərəkatının Parlament Şəbəkəsi və Qoşulmama Hərəkatının Gənclər Təşkilatının yaradılması ilə Hərəkatın təsirinin institusionallaşdırılmasında mühüm rol oynayıb. İnstitusional davamlılığa doğru atılan bu addımlar Azərbaycanın Qoşulmama Hərəkatının təsirinin davamlılığını və effektivliyini təmin etmək, gələcək sədrlər üçün uğurlu mirasa zəmin yaratmaqla bağlılığını nümayiş etdirir”, - deyə Q.Nəvvab bildirib.
Beynəlxalq ekspert qeyd edib ki, Prezident İlham Əliyev tədbirdəki çıxışında iqlim dəyişikliyi, məcburi miqrasiya problemlərinin həllinin, mədəniyyətlərarası və dinlərarası dialoqun təşviqinin vacibliyini də vurğulayıb. Azərbaycan lideri islamafobiya, ksenofobiya və İslamı zorakılıq və terrorla eyniləşdirmək cəhdlərini pisləməyə çağırış etdi.
Azərbaycan QH-yə sədrliyi dövründə beynəlxalq birliyin məsuliyyətli və fəal üzvü kimi öz rolunu nümayiş etdirib: Azərbaycan 80-dən çox ölkəyə, o cümlədən Qoşulmama Hərəkatının digər üzvləri də daxil olmaqla, COVID-19 ilə bağlı maliyyə və humanitar yardım göstərdi ki, bu da onun qlobal həmrəylik və əməkdaşlığa sadiqliyini nümayiş etdirir. Bundan əlavə, Azərbaycanın Afrikada və İnkişaf etməkdə olan kiçik ada dövlətlərində pandemiyadan sonrakı bərpanı dəstəkləmək üçün vəsait ayırması, eləcə də Ümumdünya Səhiyyə Təşkilatına könüllü töhfələr verməsi onun qlobal çağırışların həllinə proaktiv yanaşmasını daha da vurğulamış oldu. Prezident İlham Əliyevin çıxışında Azərbaycanın çoxtərəfliliyə sarsılmaz sadiqliyi və Qoşulmama Hərəkatının yenidən formalaşan dünya düzənində öz yerini tapmasının zəruriliyi də vurğulanıb.
Ekspertin fikrincə, Azərbaycanın BMT çərçivəsində ciddi islahatlara çağırışı, xüsusən də qurumun Təhlükəsizlik Şurasının daha təmsilçi və coğrafi baxımdan ədalətli olması üçün onun tərkibini genişləndirməsi beynəlxalq ictimaiyyətdə rezonans doğurur. Bundan başqa, Qoşulmama Hərəkatının, İslam Əməkdaşlıq Təşkilatının və Afrika İttifaqının sədrləri üçün rotasiyalı yerlərlə yanaşı, Qoşulmama Hərəkatına BMT Təhlükəsizlik Şurasında bir daimi yer verilməsi təklifi Azərbaycanın qlobal qərarlarda ədalətli təmsilçiliyi və inklüzivliyi təşviq etmək öhdəliyini özündə əks etdirir.
“Prezident İlham Əliyevin neokolonializmlə mübarizəyə verdiyi töhfə təqdirəlayiqdir və Azərbaycanın Fransanı öz müstəmləkə keçmişini tanımağa və ona münasibət bildirməyə, tarixi ədalətsizliklərə görə üzr istəməyə çağırması keçmiş səhvlərin etiraf edilməsi və düzəltməsinin vacibliyini güclü xatırlatmağa xidmət edir”, - deyə Qayser Nəvvab vurğulayıb.
Beynəlxalq ekspert onu da əlavə edib ki, Azərbaycanın Vətən müharibəsində Qələbə qazanaraq 30 il davam edən erməni işğalına son qoyması, beynəlxalq hüquqa və ədalətə riayət etməklə öz ərazilərini geri qaytarması ölkə və region üçün mühüm nailiyyətdir. Qalib ölkə olan Azərbaycan mina təhlükəsi və ətraf mühitin çirklənməsi kimi ciddi problemlərə baxmayaraq, azad edilmiş ərazilərində möhtəşəm quruculuq işləri həyata keçirir.
Bölmənin digər xəbərləri
