Pan Gi Mun liderləri qlobal istiləşməyə qarşı qəti tədbirlər görməyə çağırıb
Bakı, 16 noyabr, AZƏRTAC
2015-ci il beynəlxalq əməkdaşlıq üçün mühüm ildir. Sentyabr ayında ölkələr 2030-cu ilədək Davamlı İnkişaf Məqsədlərini qarşılarına qoyublar. Dörd həftədən sonra isə liderlər iqlim üzrə yeni qlobal razılaşmanı imzalayacaqlar. Ölkələr tərəfindən təqdim edilən iqlim dəyişikliyinə qarşı mübarizə planları istixana qazlarının atmosferə buraxılmasını əhəmiyyətli dərəcədə azaldacaq, lakin orta illik temperaturun Selsi üzrə 2 dərəcə yüksəlməsinin qarşısını ala bilməyəcək.
AZƏRTAC BMT-nin Xəbərlər Mərkəzinə istinadla bildirir ki, bu fikri BMT-nin baş katibi Pan Gi Mun Antalyada keçirilən mətbuat konfransında səsləndirib. Antalyada “Böyük İyirmiliyin” (G20) Sammiti keçirilir.
BMT-nin baş katibi dünya liderlərini iqlim dəyişikliyinə qarşı mübarizədə qəti tədbirlər görməyə və Suriyadakı siyasi prosesin irəliləməsi istiqamətində cəhdləri davam etdirməyə çağırıb.
Pan Gi Mun dörd milyon suriyalı qaçqının sığınacaq tapdığı ölkələrin - Türkiyə, Livan və İordaniyanın hakimiyyət orqanlarına təşəkkür edərək, Avropa ölkələrini qaçqınlara yardımın arasını kəsməməyə çağırıb.
Bölmənin digər xəbərləri
