Partiya sədri: Prezident İlham Əliyevin qətiyyəti Ermənistanı diz çökdürdü
Bakı, 9 oktyabr, AZƏRTAC
Sentyabrın 27-də işğalçı Ermənistan ordusu Azərbaycana qarşı genişmiqyaslı hücuma başlayanda Nikol Paşinyana elə gəlirdi ki, qısa müddət ərzində xəbis niyyətinə nail olacaq və işğal zonasını bir qədər də genişləndirəcək. Ancaq qarşısında güclü və qüdrətli Azərbaycan Ordusunu gördükdə özünü itirdi. Hər gün Ermənistan ordusunun böyük itki verməsi xəbəri Paşinyanı çıxılmaz vəziyyətə saldı və son ümid yeri kimi, dünya liderlərinə yalvarmağa başladı. Paşinyan saatlarla telefondan asılı qalsa da, zənglərinə cavab verən olmadı. Aldığı cavablar isə onu daha çətin vəziyyətə saldı: “Azərbaycan öz ərazisində vuruşur”. Bu, o demək idi ki, sən işğalçısan, işğal etdiyin əraziləri tərk et. Yoxsa, Azərbaycan Ordusu sənə divan tutacaq.
Bu fikirləri AZƏRTAC-a Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov deyib.
K.Seyidov bildirib ki, Azərbaycanın ərazi bütövlüyünün təmin olunması uğrunda mərdliklə vuruşan Silahlı Qüvvələrimiz tezliklə təcavüzkar ordunu yerində oturtdu. Ermənistan ordusu qarşısında 2016-cı ildəkindən də güclü və rəşadətli ordu gördü. Hər gün Ermənistan ordusu ağır itkilərə məruz qaldı. Hətta erməni hərbçiləri silah-sursatla yanaşı, döyüş bayrağını da atıb qaçdı. Ermənistanın baş nazirinin dünya liderlərinə yalvarışlarından sonra Fransa prezidenti Emmanuel Makronun mənasız bəyanatı yayıldı. ATƏT-in Minsk qrupunun həmsədr dövlətlərindən biri olan Fransa prezidentinin qeyri-ciddi, dövlət başçısına yaraşmayan böhtançı bəyanatı da işğalçı ölkənin köməyinə çatmadı.
Prezident İlham Əliyev böyük güclər və Ermənistanın havadarları tərəfindən olan təzyiqlərə mərd-mərdanə sinə gərdi və bu gün də gərməkdədir. Azərbaycanın milli maraqları Prezident İlham Əliyev üçün ən ali dəyərdir. Bu, təcavüzkar Ermənistanın sonuncu genişmiqyaslı hücumunda da özünü açıq şəkildə büruzə verdi. Ali Baş Komandanın rəhbərliyi ilə Azərbaycan Silahlı Qüvvələri 10 günlük müddət ərzində Ermənistanın 30 il ərzində havadarlarının dəstəyi ilə qurduğu ordusunu darmadağın etdi. Bundan sonra Ermənistana onilliklər lazım olacaq ki, özünə ordu qursun. Bu müharibədə diqqət çəkən məqamlardan biri də odur ki, Ermənistanın dövlət olaraq iqtisadi əsasları əhəmiyyətli dərəcədə sarsıdıldı. Çünki Azərbaycan Ordusunun güclü zərbələri, düşmənin texnikasını sıradan çıxarması onlara milyardlarla dollar ziyan vurub. Onsuz da iqtisadi tənəzzül içərisində boğulan Ermənistan bundan sonra çətin ki, özünə gəlsin.
Ermənistanın uzun illərdir status-kvonu saxlamaq cəhdi alt-üst oldu. Prezident İlham Əliyev işğala əsaslanan status-kvonu özü dəyişdirdi. Dövlət başçısının düzgün müəyyənləşdirdiyi siyasi strategiya döyüş meydanında Azərbaycan əsgərlərinin əldə etdiyi uğurları diplomatiya meydanında da uğurlara çevrilir və indi danışıqların şərtlərini Azərbaycan tərəfi müəyyən edir.
Ermənistanın baş naziri Nikol Paşinyan ağ bayraq qaldırmağa məcbur oldu. Bir vaxtlar ölkəmizə qarşı iddia və hikkələrlə danışan Paşinyan artıq məğlubiyyətlə barışır. Halbuki Ermənistan rəhbərliyi danışıqlarda Azərbaycana şərt qoymaq, danışıqlar prosesinin formatını dəyişmək iddialar irəli sürürdü. Onun bütün iddiaları darmadağın edildi. İndi vəziyyət tamamilə dəyişib. Ermənistan Azərbaycanın tələb etdiyi şərtlər əsasında danışıqlar prosesinə getmək üçün bu gün özü yalvarır.
Prezident İlham Əliyev əzmli və qətiyyətli siyasətçi, uzaqgörən, praqmatik düşüncəli dövlət başçısı olduğunu bir daha sübut etdi. Ermənistanın havadarları olan dövlətlər və böyük güclər tərəfindən təzyiqlərə baxmayaraq, möhtərəm Prezidentimiz öz prinsipiallığını və qəti əzmini bir daha nümayiş etdirdi.
Bölmənin digər xəbərləri
