Paytaxtın atmosfer havasında olan zərərli qaz qarışıqları norma həddindədir
Bakı, 23 dekabr, AZƏRTAC
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Bakının bəzi rayonlarında xoşagəlməz qoxu ilə bağlı monitorinq keçirib.
Nazirliyin mətbuat xidmətindən AZƏRTAC-a verilən məlumata görə, atmosfer havasından nümunələr götürülüb və analizlər aparılıb. Atmosfer havasında olan zərərli qaz qarışıqları sanitar norma həddində olub. Son 3 gün ərzində Bakı şəhərində əlverişsiz meteroloji hava şəraiti ilə bağlı atmosferə atılan tullantıların, qaz qarışıqlarının səpələnməsi passivləşib, bu da əsasən Xətai rayonu, Babək prospekti və Azadlıq meydanı ətrafı ərazilərdə havadan pis qoxunun yayılmasına səbəb olub. Havada insan sağlamlığına zərər verə biləcək qaz qarışıqlarının heç birində artım qeydə alınmayıb.
Məlumatda bildirilir ki, neft emalından və nəqliyyat vasitələrindən atılan tullantılar pis qoxu ilə müşayiət edilir və gecə saatlarında temperaturun aşağı olması, gündüz isə yüksəlməsi nəticəsində ağır hava aşağı təbəqələrdə sıxılıb qalır. Məhz bu da qaz qarışıqlarının səpələnməsinə imkan vermir və havada pis qoxunun əmələ gəlməsinə şərait yaradır. Bu da insanlarda diskamfort əmələ gətirir.
Bölmənin digər xəbərləri
