Petre Mamradze: “Azərbaycanın təcrübəsi bizim üçün bir nümunə olmalıdır”
Tbilisi, 3 sentyabr, AZƏRTAC
“Azərbaycanda sentyabrın 1-də növbədənkənar parlament seçkiləri azad, demokratik, şəffaf və bütün qaydalara uyğun keçirildi. Bu bir daha sübut etdi ki, Azərbaycanın seçki sahəsində zəngin təcrübəsi var. Azərbaycanın təcrübəsi Gürcüstan üçün nümunə olmalıdır”.
Bu sözləri AZƏRTAC-a müsahibəsində Gürcüstanda Beynəlxalq Qafqaz Universitetinin professoru, politoloq Petre Mamradze söyləyib.
Onun sözlərinə görə, Azərbaycanda keçirilən növbədənkənar parlament seçkiləri bir neçə maraqlı məqamla yadda qaldı. Bir maraqlı məqam ondan ibarət idi ki, seçkilər Azərbaycanın dünya əhəmiyyətli COP29 tədbirinə ev sahibliyi edəcəyi ərəfədə keçirildi. Maraqlıdır ki, məhz parlamentarilər seçkilərin bir qədər tez keçirilməsi ilə bağlı dövlət başçısına müraciət etmişdilər və belə də oldu.
Seçki öncəsi hər bir deputatlığa namizəd təbliğat və təşviqat kampaniyasını apardı və layiqli olan qalib gəldi.
Politoloq deyir ki, Azərbaycanda keçirilən seçkilərdə digər bir maraqlı məqam kiminsə bu prosesə müdaxilə edə bilməməsidir: “Sevindirici haldır ki, prosesə heç kim müdaxilə edə bilmədi. Təbii ki, söhbət Qərbdən gedir. Qərb institutlarını iki yerə - xoş və pisniyyətli təşkilatlara bölmək olar. Xoşniyyətli institutlar öz idarəçilik modellərinə inanır və istəyirlər ki, bütün ölkələrdə eyni model tətbiq edilsin. Amma, belə olan halda onlar minilliklərə söykənən mədəniyyəti, adət-ənənələri, mentaliteti nəzərə almırlar. Bu tədbirdə xoş nəticə əvəzinə xaos əmələ gəlir. Bəzən elə olur ki, xoş niyyət belə doğru istiqamət seçməyəndə ağır nəticələr verə bilər”.
“Digər qruplar isə öz maraqlarını güdən və bu maraqlar naminə insanların məhv olmasını istəyənlərdir. Bunları da mən pisniyyətli insanlar adlandırıram. Qərbin pisniyyətli təşkilatları məhz bunlardır. Onlar daim dinc ölkələrdə xaos yaradıb, insanlar arasında çaxnaşma salıb, iğtişaşlar yaradaraq öz maraqlarını güdürlər. Son zamanlar Qərbin öz alimləri də bu barədə çox yazırlar. Biz hazırda ərəb ölkələrində nə baş verdiyinin şahidi oluruq. Həmin ölkələrdə müharibə gedir, günahsız insanlar həlak olurlar. O vaxt Qərbi dəstəkləyib hökuməti dağıdan insanlar indi peşman olub, dinc zamanları arzulayırlar. Bu olmasın deyə, biz öz dövlətimizin, suverenliyimizin və milli maraqlarımızın arxasında durmalıyıq”, - deyə politoloq vurğulayıb.
Professor hesab edir ki, Qərbin istəyi alınmayacaq. Ona görə ki, biz xalq olaraq hamılıqla bir yerdə onların məkrli planlarını pozmaq və ölkədə stabilliyi qorumaq üçün çalışırıq.
Professor deyir: “Azərbaycanın zəngin seçki təcrübəsi Gürcüstan üçün nümunə olmalıdır. Növbədənkənar parlament seçkiləri çox sakit və bütün demokratik qaydalara uyğun keçdi. Bununla da Qərbin arzuları ürəyində qaldı. Qərb uzun illər davam edən əməlləri ilə Azərbaycanda öz sonunu gətirdi. Qərbin beyin mərkəzləri elə düşünür ki, Azərbaycanda hələ də 90-cı illərdir. Elə bilirlər ki, əvvəlki kimi Azərbaycan ziyalıları Qərbə maraq salır. Amma düşünmürlər ki, daha Qərbdə göstərilən yaşayışa aldanan, demokratiya, iqtisadi inkişaf kimi yalanlara maraq yoxdur. Bütün bunlar gözümüzün qarşısında puç oldu. Onların bütün yalanları ifşa edildi”.
P.Mamradzenin fikrincə, hər kəs başa düşdü ki, Qərb arzulanan bir yer deyil. Çünki orada hər addımın arxasında maraqlar dayanır. Xüsusi maraq olmadan bir qəpik belə ayrılmır. Artıq insanlar başa düşür ki, Qərb üçün sənin vacib olmağın onların işləri həyata keçənə qədərdir.
Tbilisi
Bölmənin digər xəbərləri
