Bakı, 9 oktyabr, Səadət Hakıyeva, AZƏRTAC

Azərbaycan Ordusunun əks-hücumundan təşvişə düşən Nikol Paşinyan acizlik göstərir. Təəssüf ki, düşmən beynəlxalq hüquq və normalara riayət etməyərək mülki obyektlərə və mülki əhaliyə zərər yetirir. Təmas xəttindən xeyli kənarda yerləşən yaşayış məntəqələrimiz hədəfə alınır. Paşinyan hakimiyyəti bununla yerli əhali arasında təşviş yaratmaq istəyir. Azərbaycan xalqı ermənilərdən fərqli olaraq müharibədən qorxmur, bombalardan, raketlərdən çəkinmir. Çünki biz başqasının deyil, öz torpağımız uğrunda mübarizə aparırıq. Bizim işimiz haqq işidir.

Bunu AZƏRTAC-a açıqlamasında Azərbaycan Respublikasının Prezidenti yanında Dövlət İdarəçilik Akademiyasının Politologiya və siyasi idarəetmə kafedrasının müəllimi, siyasi elmlər üzrə fəlsəfə doktoru, “Bakı” politoloqlar klubunun sədri, politoloq Zaur Məmmədov deyib.

Z.Məmmədov vurğulayıb ki, Azərbaycan şəhərinə, kəndinə atılan hər bomba, hər raket xalqımızı daha da coşdurur, qələbə əzmi ilə ruhlandırır. Hər bir Azərbaycan vətəndaşı döyüşlərə hazır olduğunu bildirir və torpaqlar uğrunda döyüşmək üçün könüllü olaraq cəbhəyə gedir. Bütün xalq ayaq üstündədir və səfərbər olub. Hər kəs əlindən gələni etməyə hazırdır. Vətənin igid oğlanları torpaq uğrunda şəhidlik zirvəsinə ucalmağa hazır olduqlarını bildirirlər. Bu, bizi Ermənistandan fərqləndirən başlıca cəhətdir. Ermənistanda isə bizdən fərqli olaraq, əsgərlər döyüşmək istəmir, hərbi xidmətə getməkdən yayınırlar. Burada vəziyyət o yerə çatıb ki, qaçmamaları üçün əsgərləri zəncirləyirlər.

Politoloq qeyd edib ki, Ermənistan tərəfindən Azərbaycan ərazisinə atılan raketlərdə kaset başlıqlardan istifadə edilməsi bu ölkənin faşist siyasətinə xidmət etdiyini bir daha göstərdi. İşğalçı ölkənin bu hərəkətlərinə dünya ictimaiyyəti, beynəlxalq təşkilatlar tərəfindən düzgün qiymət verilməlidir. O deyib: “Təəssüflər olsun ki, beynəlxalq ictimaiyyət Ermənistanın mülki əhalini və mülki infrastrukturu raketlə hədəfə almasına laqeyd münasibət göstərir və susmaqda davam edir. Bu da onu deməyə əsas verir ki, bəzi dünya ölkələri Ermənistanın timsalında terrorçu ölkəyə dəstək vermiş olur. Əvvəl biz İraqda İŞİD terror təşkilatını görürdüksə, bu gün Cənubi Qafqazda terror dövləti olan Ermənistanın formalaşdığını görürük”.

Ermənistanın Azərbaycan Ordusunda muzdlu döyüşçülərin döyüşdüyü barədə bəyanatlarına da münasibət bildirən Z.Məmmədov qeyd edib: “Xaricdən Azərbaycana muzdlu döyüşçülərin gətirilməsinə ehtiyac yoxdur. Çünki Azərbaycan Ordusu düşməndən qat-qat güclüdür. Ordumuz ən müasir silahlarla təchiz olunub. Muzdlu döyüşçülər səhra şəraitində döyüşməyə uyğunlaşıblar. Qarabağda isə tamamilə başqa coğrafi şərait mövcuddur. Hazırda döyüş meydanında ən müasir silahlardan istifadə olunur və həmin səhra döyüşçüləri onlardan istifadə etməkdə çətinlik çəkirlər. Əksinə, Ermənistan ordusunda Yaxın Şərqdən gətirilən muzdlu döyüşçülərin döyüşməsi faktdır. Bu barədə Azərbaycan Müdafiə Nazirliyi məlumat və video yayıb”.

Politoloq diqqətə çatdırıb ki, Ermənistan əhalisi hazırda ruh düşkünlüyü yaşayır. Erməni mətbuatında Azərbaycan Ordusunun əldə etdiyi uğurlar barədə heç bir məlumat verilmir və əhalidən gizlədilir. Yaxın günlərdə Paşinyan hakimiyyətinin devrilməsi qaçılmazdır. Robert Köçəryan başda olmaqla, Arkadi Qukasyan, Bako Saakyan, ümumiyyətlə, Paşinyanın bütün opponentləri onun devrilməsi üçün çalışırlar. Ermənistanın siyasi hakimiyyəti məhvə məhkumdur və bu məhvi məhz onun hazırkı rəhbəri hazırlayıb.