Prezident İlham Əliyev müsahibəsində Qərbi Azərbaycanla bağlı hədəfləri bir daha bəyan etdi
Bakı, 14 yanvar, AZƏRTAC
Prezident İlham Əliyev Qərbi Azərbaycandan olan ziyalılarla görüşdə tarixi və siyasi müstəvidə bir sıra mühüm məqamları açıqladı. Bununla dövlət başçısı bir daha bildirmək istədi ki, işıqlı gələcəyə getmək üçün öncə tarixi keçmişə dərindən nəzər salıb, əvvəlcə itirdiklərimizi geri qaytarmalıyıq. Bunun üçün isə tarixi reallıqları mükəmməl bilməliyik.
Bu fikirləri AZƏRTAC-a açıqlamasında UNESCO Beynəlxalq Müəllimlər Forumunun üzvü, “Qızıl Qələm” mükafatçısı Aidə Bəndəliyeva söyləyib. O bildirib ki, bütün bu tarixi həqiqətləri dərindən bilən ölkə rəhbəri Qərbi azərbaycanlıların öz dədə-baba torpaqlarından qovulmasını onların hüquqlarının kobud şəkildə pozulması kimi dəyərləndirərək, tezliklə onların doğma torpaqlarına qayıtmaları ilə bu hüquqların bərpasının vacibliyini yerli televiziya kanallarına müsahibəsində bir daha vurğuladı: “Bu gün sirr deyil ki, Qərbi Azərbaycan İcması uzun illər deportasiyaya məruz qalmış İcma kimi öz hüquqlarından məhrum idi. Əlbəttə ki, Qarabağ dərdi, problemi olan yerdə Qərbi azərbaycanlıların hüquqlarından danışmaq, bəlkə də, vaxtından əvvəl atılan bir atəşə bənzəyə bilərdi. Amma bu gün hesab edirəm ki, biz tam haqlı olaraq bu mövzunu artıq beynəlxalq arenaya çıxarmışıq. Mənim tövsiyələrim, yəni dekabrın 24-də verdiyim tövsiyələr yerinə yetirilir. Xüsusi işçi qrupu yaradılıb, verdiyim bütün tapşırıqlar və eyni zamanda, yerlərdən gələn təkliflər əsasında biz vahid konsepsiya üzərində işə başlamışıq. Əlbəttə ki, Qərbi azərbaycanlılar öz dədə-baba torpaqlarına qayıtmalıdırlar, bu, onların hüququdur, bütün beynəlxalq konvensiyalar bu hüququ onlar üçün tanıyır. Biz də Azərbaycan dövləti olaraq əlimizdən gələni etməliyik ki, bu hüququ təmin edək. Yenə də mən orada da İcmanın nümayəndələri ilə görüş zamanı demişdim ki, biz bunu sülh yolu ilə etmək istəyirik və əminəm ki, buna nail olacağıq”.
Dövlət başçısının bu çıxışı Qərbi Azərbaycana qayıdışın yol xəritəsini təşkil etməklə, soydaşlarımızın tarixi diyarımız olan Qərbi Azərbaycana qayıdacaqlarına əminliyini ifadə edib. Ölkə rəhbərinin qeyd etdiyi kimi, bu sahədə təbliğat və təşviqat işləri aparılmalı, müxtəlif müstəvilərdə görüşlər, forumlar keçirilməli, soyqırımı faktları dünya ictimaiyyətinə çatdırılmalıdır.
Yanvarın 10-da yerli televiziya kanallarına müsahibəsində Prezident İlham Əliyev Qərbi azərbaycanlılarla bağlı ölkəmizin yeni hədəflərinin və strategiyasının, verilən tapşırıqlarda hazırlanacaq Qayıdış Konsepsiyanın sülhsevər olmasının, həmçinin bütün beynəlxalq konvensiyalarda bizə məqbul olan müddəaları götürüb bunun əsasında öz hüququmuzu tələb edilməsinin vacibliyini vurğulayıb. Dinc yolla, beynəlxalq hüququn verdiyi imkanlara söykənərək buna nail olunması beynəlxalq hüququn normaları və öhdəlikləri baxımından çox önəmlidir. Çünki dinc yolla öz torpaqlarına qayıtmaq istəyi dünyada hər kəsin təbii haqqıdır və belə yanaşma mənfur qüvvələrin gələcəkdə bizə qarşı istifadə edə biləcəyi hər hansı haqsız ittihamların qarşısını almış olur.
Prezidentin qeyd etdiyi daha bir mühüm məqam Qərbi azərbaycanlıların öz doğma torpaqlarına qayıtmalarının həm də bütün Avrasiya məkanında monodövlət olmadığı halda, Ermənistan üçün bu monodövlət damğasını öz üzərindən götürməsinə səbəb olacağı amilidir. Dövlət başçısı vurğulayıb ki, deportasiya olunmuş azərbaycanlıların Qərbi Azərbaycana qayıtmaları ermənilərə problem yaratmayacaq. Çünki onların oraya qayıtmaları orada yaşayan ermənilərin oradan çıxarılması demək deyil. Çünki o kəndlər boşdur və biz, əlbəttə ki, əlimizdə olan bütün imkanlardan istifadə edəcəyik.
“Dekabrın 24-də Qərbi Azərbaycandan olan ziyalılarla görüşdə ölkə rəhbəri tarixi və siyasi müstəvidə bir sıra mühüm məqamları açıqlayaraq, soydaşlarımızın tarixi diyarımız olan Qərbi Azərbaycana qayıdacaqlarına əminliyini ifadə edib. Bu əminliyin əsasında 2020-ci ildə 44 günlük Vətən müharibəsi dövründə aparılan qətiyyətli, müdrik siyasətin, mahir diplomatik bacarığın, Azərbaycan Ordusunun qəhrəmanlığı və xalqımızın birliyi nəticəsində Azərbaycanın erməni işğalına son qoyması, Qarabağ və Şərqi Zəngəzurun işğaldan azad edilməsi yolunda əldə edilən böyük Qələbənin tarixi reallığı dayanır. Bu əminlik artıq qədim Qərbi Azərbaycandakı torpaqlarımıza Böyük Qayıdış prosesinin tezliklə gerçəkləşəcəyindən xəbər verir. Ümid edirik ki, necə ki, vaxtilə Qarabağ mövzusu bütün Azərbaycan xalqını birləşdirdi və biz istəyimizə nail olduq, bu mübarizədə də xalq və hakimiyyət birliyi ilə şanlı Qələbə bizim olacaq”, - deyə A. Bəndəliyeva fikrini yekunlaşdırıb.
Bölmənin digər xəbərləri
