Prezident İlham Əliyevin enerji siyasəti Azərbaycanı əhəmiyyətli regional oyunçuya çevirib
Bakı, 15 fevral, AZƏRTAC
Müstəqillik dövrünün 1280 meqavat gücündə ən böyük İstilik Elektrik Stansiyasının təməlqoyma mərasiminin keçirilməsi ölkəmizin həyatında mühüm hadisədir.
Bunu AZƏRTAC-a açıqlamasında Milli Məclisin Təbii ehtiyatlar, energetika və ekologiya komitəsinin üzvü Fatma Yıldırım deyib.
Deputat Azərbaycanın özünün enerji təhlükəsizliyini təmin etməklə yanaşı, Avropanın enerji təhlükəsizliyində mühüm rol oynadığını bildirib: “Prezident İlham Əliyevin enerji siyasəti Azərbaycanın dünyadakı önəmini artıraraq, dünya enerji təhlükəsizliyində əhəmiyyətli regional oyunçuya çevirib.
“Gülüstan” sarayında İstilik Elektrik Stansiyasının təməlqoyma mərasimində çıxış edən Prezident İlham Əliyev Azərbaycanın uğurlarından, tərəfdaş ölkələrlə əlaqələrinin inkişafından geniş bəhs edərək Mingəçevir şəhərinin nəinki Azərbaycanın, bütün Qafqazın elektroenergetika mərkəzi kimi yeni dövrünün başladığını bəyan edib. 1280 meqavat gücündə olan stansiya ölkəmizin enerji potensialını daha da gücləndirəcək. Bu, Azərbaycanın enerji təhlükəsizliyinə verilən növbəti töhfə olacaq. Azərbaycan öz imkanlarından tam istifadə edərək həm daxili tələbatını ödəyəcək, həm də elektroenergetika, təbii qaz sahəsində daha böyük addımlar atacaq. Hazırda Avropa məkanında Azərbaycan qazına böyük tələbat olduğu üçün bu stansiya, eyni zamanda, Avropanın enerji təhlükəsizliyinə də növbəti töhfə olacaq”, - deyə F.Yıldırım qeyd edib.
Onun sözlərinə görə, son illər ölkəmizdə elektroenergetika sahəsi çox sürətlə inkişaf edir. Belə ki, son 20 ildə Azərbaycanda 34 elektrik stansiyası inşa edilib ki, onların generasiya gücü təqribən 3400 meqavata bərabərdir. Yeni stansiyanın 2025-ci ildə açılışının hədəflənməsi də ölkəmizin bu sahədə imkanlarının təqdimatında əhəmiyyətli rol oynayır. Dövlətimizin başçısı çıxışında işğaldan azad edilmiş ərazilərimizdə genişmiqyaslı bərpa-quruculuq işlərində elektroenergetika sahəsinin önəmini vurğulayıb.
Tarixi Zəfərimizdən ötən iki ildən artıq dövrdə Şərqi Zəngəzur bölgəsində 50 meqavatdan çox generasiya gücü yaradılıb və bu rəqəm ilin sonuna qədər 200 meqavata çatdırılacaq. Şərqi Zəngəzurun və Qarabağın böyük hidroenergetika potensialı həmin bölgələrdə 500 meqavata qədər generasiya gücünün yaradılmasına imkan verəcək.
F.Yıldırım qeyd edib ki, İES xarici tərəfdaşlarla əməkdaşlıq şəraitində inşa olunacaq. Təməlqoyma mərasimdə İtaliyanın şirkətlər və “Made in Italy” naziri Adolfo Ursonun iştirakı da bu baxımdan əhəmiyyətlidir. Cari ilin ötən dövründə İtaliyanın üç nazirinin ölkəmizə səfəri İtaliya ilə Azərbaycan arasında möhkəm əlaqələrin olmasını göstərir. Ümumilikdə iki ölkə arasında energetika sahəsində əməkdaşlıq ənənəvidir. Bu mühüm məqamı qeyd etmək kifayətdir ki, iki il bundan əvvəl istifadəyə verilən Cənub Qaz Dəhlizinin başlanğıcı Azərbaycanın Xəzər dənizindəki sektorudursa, son məntəqəsi İtaliyadır. Dövlətimizin başçısı İlham Əliyev Cənub Qaz Dəhlizinin əsas seqmentlərindən olan TAP layihəsini Azərbaycan və İtaliyanın birgə uğuru kimi dəyərləndirdi. Eyni zamanda, işğaldan azad olunmuş ərazilərin bərpası işində Türkiyə ilə yanaşı İtaliya şirkətləri də fəal iştirak edirlər. Bu da dostluğumuzun nümunəsidir.
Bölmənin digər xəbərləri
