İQTİSADİYYAT

Prezident mükafatçısı: Motivasiya olunan könüllülər uğurlu layihənin əsas sütunudur - MÜSAHİBƏ

19.03.2025 [11:25]
Çap et
A⁺ A^-

Bakı, 19 mart, Təhminə Verdiyeva, AZƏRTAC

Böyük tədbirlərin arxasında görünməyən, lakin onların uğurunda mühüm rol oynayan bir qüvvə var – könüllülər. COP29 kimi beynəlxalq miqyaslı bir tədbirdə isə bu qüvvəni bir araya gətirmək, yönləndirmək və motivasiya etmək olduqca çətin və məsuliyyətli bir işdir. Minlərlə insanın arasından ən uyğunlarını seçmək, onların bacarıqlarını üzə çıxarmaq və tədbir boyunca ahəngdar işləmələrini təmin etmək – bu, təkcə idarəetmə deyil, həm də incəsənətdir. Gənc bir lider kimi bu prosesin içində olmaq, qarşıya çıxan maneələri aşmaq və hər bir könüllünün tədbirə verdiyi töhfəni hiss etdiyini görmək isə unudulmaz bir təcrübə idi”, - deyə fikirlərini AZƏRTAC-la bölüşən gənc Prezident mükafatçısı Jalə Muradovanın maraqlı müsahibəsini təqdim edirik.

-COP29 konfransı çərçivəsində könüllülərlə iş üzrə baş menecer kimi qarşınıza çıxan ən böyük çətinlik nə oldu və bu çətinliyin öhdəsindən necə gəldiniz?

-COP29 miqyasına və əhəmiyyətinə görə Azərbaycanın ev sahibliyi etdiyi ən böyük tədbirlərdən biri idi. Könüllülər üçün qeydiyyatı açıq elan etdikdə 16 min nəfər qeydiyyatdan keçmişdi. Bu, ölkə üçün rekord say idi. Əsas çətinliklərdən biri də 16 min nəfərin arasından tədbirdə iştirak edə biləcək könüllüləri seçmək idi. Komandamızla birlikdə aylarla davam edən çoxmərhələli seçim prosesi həyata keçirdik. Sonda 3 min nəfər seçildi. Tədbir müddətində onların koordinasiyasının daha asan olmasının əsas səbəbi də seçim prosesinin nə qədər uğurlu olduğunu göstərirdi. Digər çətinlik isə könüllülərin müxtəlif bacarıq səviyyələrinə uyğun vəzifələrə təyin edilməsi və motivasiyalarının yüksək tutulması idi. Hər bir könüllünün güclü tərəflərini nəzərə alaraq onları ən uyğun sahələrə yönləndirdik. Bundan əlavə, davamlı ünsiyyət, təşəkkür mesajları və kiçik mükafatlandırma sistemləri ilə motivasiyanı yüksək tutmağa çalışdıq. Komandamızın problemlərin həllində çevik olmaq və sürətli qərarvermə bacarığı bu prosesdə ən vacib faktor oldu.

-Belə bir tədbirin idarə olunmasında iştirakınız sizə hansı yeni bacarıqlar qazandırdı və bu təcrübələr gələcək karyeranıza necə təsir etdi?

-Bu, mənim üçün həm peşəkar, həm də şəxsi inkişaf baxımından böyük bir təcrübə oldu. Müxtəlif ölkələrdən olan tərəfdaşlarla ünsiyyət qurmaq və fərqli iş üslublarına uyğunlaşmaq liderlik və kommunikasiya bacarıqlarımı daha da gücləndirdi. Fərqli yanaşmaları bir araya gətirmək və beynəlxalq əməkdaşlıq qurmaq qabiliyyətim inkişaf etdi. Bundan əlavə, böyük tədbirlərdə gözlənilməz problemlər qaçılmazdır. Bəzən hadisələr planlaşdırıldığı kimi getmir və sürətli həll yolları tapmaq lazım gəlir. Böyükmiqyaslı tədbirlərdə işləmək mənə çevik və effektiv qərarvermə bacarığını qazandırdı. Bu təcrübə mənim gələcək karyeram üçün əvəzsizdir, çünki beynəlxalq tədbirlərin idarə olunması sahəsində qazandığım biliklər və bacarıqlar, gələcəkdə istər böyük korporativ layihələrdə, istərsə də sosial innovasiya sahəsində uğurlu olmağım üçün güclü zəmin yaradır. Uzunmüddətli perspektivdə isə əldə etdiyim təcrübələri daha genişmiqyaslı layihələrdə tətbiq edərək qlobal təsirə malik işlər görməyi planlaşdırıram.

- “Regional İnkişaf” İctimai Birliyində və Dubay Ekspo 2020-də təcrübə qazanmısınız. Bu iki platformadan nə öyrəndiniz?

-İctimai Birlikdəki fəaliyyətim mənə sosial layihələrin effektiv həyata keçirilməsi üçün vacib olan əsas bacarıqları qazandırdı. Layihələrin davamlılığını təmin etmək, dövlət və özəl sektorla əməkdaşlıq qurmaq kimi sahələrdə dərin biliklər əldə etdim. Burada Bakıda və regionlarda yaşayan insanların sosial rifahını yaxşılaşdırmaq, onların təhsil, ekoloji və iqtisadi inkişafına töhfə vermək məqsədilə müxtəlif layihələrin hazırlanması və icrası ilə məşğul oluruq. Xüsusilə könüllülərlə iş və onların şəxsi inkişafının təmin olunması, müxtəlif yaş qruplarından olan insanlarla sosial fəaliyyətlərin təşkili, maarifləndirmə kampaniyaları həyata keçiririk. Bu fəaliyyətlər zamanı qazandığım ən önəmli təcrübələrdən biri düzgün ehtiyac analizinin aparılması və uzunmüddətli əlaqələrin qurulmasının sosial layihələrin uğurunu müəyyən etməsidir. Müxtəlif qurumlarla əməkdaşlıq etmək, könüllü resurslarını düzgün yönləndirmək və sosial təsiri ölçmək üçün effektiv monitorinq mexanizmləri hazırlamaq kimi bacarıqlarımı inkişaf etdirdim. Düşünürəm ki, bu bacarıqlar layihənin effektiv idarə olunmasını təmin etmək üçün vacibdir. 197 ölkənin iştirak etdiyi Dubay Ekspo 2020-də isə Azərbaycan pavilyonunda fəaliyyət göstərirdim. Tədbir indiyə qədər keçirilən ekspolar arasında ən böyüyü idi və çox yüksək səviyyədə təşkil olunmuşdu. Hər gün on minlərlə ziyarətçi qəbul edən milli pavilyonda 6 ay ərzində qonaqlara ölkəmizin zəngin tarixi, milli dəyərləri, biomüxtəlifliyi, mətbəxi, Azərbaycanın inkişafı sahəsində əldə etdiyi uğurlar barədə ətraflı məlumat vermişəm. Pavilyonu ziyarət edənlər arasında müxtəlif ölkələrin dövlət və hökumət başçıları, rəsmi nümayəndə heyətləri də olurdu ki, onları Azərbaycan pavilyonunun fəaliyyəti barədə məlumatlandırırdıq. Bu müddət ərzində beynəlxalq tədbirlərin idarə olunması, qlobal auditoriya ilə effektiv ünsiyyət qurmaq və protokol qaydalarına uyğun rəsmi nümayəndələri qarşılamaq sahəsində dəyərli təcrübə qazandım. Mədəniyyətlərarası kommunikasiyanı inkişaf etdirmək, fərqli ölkələrdən olan insanlara Azərbaycanın potensialını doğru şəkildə təqdim etmək mənim üçün həm peşəkar, həm də şəxsi inkişaf baxımından əhəmiyyətli oldu.

-Gənc lider və menecer olaraq könüllülərin motivasiyası üçün hansı əsas strategiyalardan istifadə edirsiniz?

- İlk növbədə, bunun üçün onların fəaliyyətə verdiyi töhfənin əhəmiyyətini vurğulamaq və onları ilhamlandırmaq vacibdir. Hər zaman hər bir könüllünün özünü komandanın dəyərli üzvü kimi hiss etməsi üçün açıq kommunikasiya mühiti yaradaraq onların fikirlərini dinləməyə və təşəbbüslərini dəstəkləməyə çalışırıq. Könüllülər yalnız hansısa tapşırığı yerinə yetirən şəxslər deyil, onlar prosesin əsas hərəkətverici qüvvəsidir. Bunu onlara hər addımda xatırladırıq. Onların maraq dairələrini və bacarıqlarını nəzərə alaraq uyğun vəzifələrə yönləndirmək fəaliyyətlərini mənalı və faydalı etmək üçün əsas amillərdən biridir. Bu, eyni zamanda, onların potensialını inkişaf etdirməyə və gələcək karyeralarına töhfə verməyə imkan yaradır. Mükafatlandırma da motivasiya üçün mühüm rol oynayır. Həm rəsmi şəkildə sertifikatlar, təşəkkürnamələr və tövsiyələr vermək, həm də müxtəlif kiçik hədiyyələr, tədbirlər və sosial görüşlərlə onların zəhmətini qiymətləndirmək əhəmiyyətlidir. Könüllülərin gördüyü işlərin nəticələrini onlara göstərmək və bu işlərin daha geniş təsirə malik olduğunu anlamaqlarına şərait yaratmaq motivasiyanı artırır. Eyni zamanda, komandada dostluq və pozitiv atmosferin olması, həm işin keyfiyyətini yüksəldir, həm də könüllülərin daha həvəslə fəaliyyət göstərməsinə səbəb olur. Onlara təkcə bir layihənin iştirakçıları kimi deyil, uzunmüddətli komandanın bir hissəsi kimi yanaşmaq lazımdır. Bütün bu yanaşmalar sayəsində könüllülərin motivasiyasını qorumaqla yanaşı, onların şəxsi və peşəkar inkişafına dəstək olmaq və gördükləri işlərdən məmnun qalmalarını təmin etmək mümkün olur.

-Layihələrin idarə edilməsi sahəsində MBA təhsili almaq sizin praktiki iş fəaliyyətinizə necə təsir etdi? Bu sahədə uğurlu olmaq istəyən gənclərə hansı məsləhətləri verərdiniz?

-MBA təhsilimi elə layihələrin idarə edilməsi istiqaməti üzrə almışam. Bu təhsil mənə daha strukturlaşdırılmış yanaşma, strateji planlaşdırma və qərarvermə bacarıqlarını inkişaf etdirməyə kömək etdi. Eyni zamanda, risklərin idarə olunması, maliyyə planlaşdırması və liderlik bacarıqlarımın daha da möhkəmlənməsinə töhfə verdi. Bu sahədə uğurlu olmaq istəyən gənclərə tövsiyəm: Praktiki təcrübəni nəzəri biliklərlə tamamlasınlar, çoxşaxəli layihələrdə iştirak edərək həm kommunikasiya, həm də idarəetmə bacarıqlarını inkişaf etdirsinlər və çətin vəziyyətlərdə çevik düşünməyi və sürətli qərar verməyi bacarsınlar.

-Gələcəkdə özünüzü hansı sahədə görürsünüz? Daha çox beynəlxalq tədbirlərlə məşğul olmaq istəyirsiniz, yoxsa sosial layihələr üzərində fokuslanmağı planlaşdırırsınız?

-Gələcək karyeramı həm beynəlxalq tədbirlərin idarə olunması, həm də sosial layihələrin həyata keçirilməsi sahələrində inkişaf etdirməyi planlaşdırıram. Çünki hər iki sahə bir-biri ilə sıx bağlıdır və mənim üçün həm şəxsi, həm də peşəkar baxımdan böyük əhəmiyyət kəsb edir. Beynəlxalq tədbirlərlə işləmək mənə müxtəlif ölkələrin təcrübələrini öyrənmək, genişmiqyaslı layihələrin idarə olunması prosesini dərindən mənimsəmək və qlobal əməkdaşlıqları inkişaf etdirmək imkanı yaradır. Bu sahədə fəaliyyətimi davam etdirərək böyük tədbirlərin təşkilində və idarə olunmasında daha yüksək səviyyədə iştirak etməyi hədəfləyirəm. Eyni zamanda, sosial layihələrin icrası və cəmiyyətin inkişafına töhfə vermək mənim üçün xüsusi önəm daşıyır. Daha əvvəl qazandığım təcrübə göstərir ki, sosial layihələr insanların həyatına real təsir göstərir və uzunmüddətli dəyişikliklərə səbəb olur. Bu iki sahəni bir araya gətirərək beynəlxalq tədbirlər vasitəsilə sosial və ekoloji məsələlərə diqqət çəkmək və müxtəlif ölkələrlə əməkdaşlıq çərçivəsində effektiv həll yolları tapmaq əsas məqsədlərimdən biridir.