Prezidentin “Euronews”a müsahibəsinin ana xəttini Ermənistanın dezinformasiya təbliğatının sındırılması təşkil edirdi – Ekspert
Bakı, 3 avqust, AZƏRTAC
Prezident İlham Əliyevin Şuşada “Euronews”a verdiyi müsahibə 44 günlük Vətən müharibəsindən sonra formalaşmış vəziyyət, regionda baş verənlər ilə bağlı məlumatların birbaşa dövlət başçısının dilindən səsləndirilməsi adət-ənənəsində növbəti mərhələdir. Vətən müharibəsindən sonra regionda cərəyan edən hadisələr, Ermənistanla Azərbaycan arasında münasibətlərin mövcud vəziyyəti və normallaşdırılması prosesi kimi məsələlərin birbaşa Azərbaycan rəhbəri dünyaya tərəfindən çatdırılması bir sıra dairələrin daha əvvəl bu istiqamətdəki manipulyasiyaları, məlumatları təhrif etməklə təqdimat imkanlarını heçə endirdi.
Azərbaycan Prezidenti İkinci Qarabağ müharibəsindən sonrakı 3 ilə yaxın müddətdə informasiya müharibəsində də uğurlu Ali Baş Komandan adını təsdiqlədi. Təsəvvür edin ki, Avropada 1990-cı illərdən başlayaraq ermənipərəst təbliğatın ruporu adını qazanmış, 30 ildən çox bu adı təsdiqləmiş “Euronews” indi Şuşadan birbaşa “Qarabağ Azərbaycandır!” mesajlı reportajlar verir. Bu, bizim regional vəziyyəti və dünya ictimai fikrini 44 günə necə dəyişməyimizin nümayişidir. Prezident İlham Əliyevin “Euronews”a müsahibəsinin ana xəttini Ermənistanın, dünyadakı erməni lobbisinin və havadarlarının ötən ilin sonlarından sistemli şəkildə həyata keçirdiyi “humanitar vəziyyət” və “blokada” ilə bağlı dezinformasiya təbliğatının sındırılması təşkil etdi.
Bu sözləri AZƏRTAC-a açıqlamasında “Gənc Demokratlar İnstitutu” İctimai Birliyinin sədri, ekspert Yeganə Hacıyeva deyib.
“Prezident bildirdi ki, Azərbaycanın Ermənistan tərəfinin təxribatlarının, suveren ərazilərimizdə qeyri-qanuni fəaliyyətin qarşısının alınması məqsədilə Laçın yolunda şəffaflığının təmin olunması məqsədilə Azərbaycanla Ermənistan arasında sərhəd-keçid və buraxılış məntəqəsinin yaradılması bölgənin təhlükəsizliyi üçün vacib şərt idi. Çünki Ermənistandan Rusiya sülhməramlı kontingentinin müvəqqəti yerləşdiyi Azərbaycan ərazisindəki Ermənistan silahlı qüvvələri üçün canlı qüvvə, silah-sursat, mina, eləcə də hərbi təyinatlı digər vasitələrin daşınması intensivləşirdi. Bununla yanaşı, Xankəndi-Xəlfəli-Turşsu və bu marşrutdan şimaldan keçən Xankəndi-Kosalar-Mirzələr-Turşsu yollarında ermənilər tərəfindən qeyri-qanuni yol tikintisi işlərinin aparılmasına cəhdlər edilirdi. Prezident diqqətə çatdırdı ki, Ermənistan bu addımları həm də sülh sazişi üzrə beynəlxalq səylərin canlanması şəraitində davam etdirirdi ki, bu, rəsmi İrəvanın sülh prosesini məqsədyönlü şəkildə pozmaq niyyətindən, eləcə də bölgədə sülhün və sabitliyin təmin edilməsində maraqlı olmaması məramından xəbər verirdi”, - deyə Y.Hacıyeva vurğulayıb.
Onun sözlərinə görə, dövlətimizin başçısı müsahibəsində Laçın yolu və daşınmalar üçün alternativ marşrut təklifi haqqında geniş məlumat verməklə Ermənistanın “humanitar vəziyyət” və “blokada” ilə bağlı dezinformasiyalarının dünya ictimaiyyətinin aldadılmasına yönəlik siyasi manipulyasiya olduğunu sübuta yetirdi. Azərbaycan Prezidenti Ermənistan tərəfinin “Laçın” dövlət sərhədindən buraxılış məntəqəsi qurulduqdan sonra da hərbi təxribatlar törətməsini, sərhədçilərimizi atəşə tutmasını, qaçaqmalçılığa cəhd edilməsini, silah və təhlükəli yüklərin daşınmasını müsahibə vasitəsilə bir daha dünya ictimaiyyətinin diqqətinə çatdırdı. Digər məqamlardan biri də Azərbaycanın Qarabağdakı erməni sakinlərin ehtiyaclarının qarşılanması üçün alternativ Ağdam-Xankəndi yolundan istifadənin səmərəli və daha funksional olması haqqında idi. Məhz bu təklifin regionda maraqlı nüfuzlu iştirakçılar tərəfindən dəstəklənməsinin səbəbi beynəlxalq hüquqla Azərbaycanın legitim addımlarına dəstəkdən başqa, həm də bu marşrutun zaman və məsafə baxımından daşınmalar üçün daha səmərəli olmasıdır.
“Prezident qeyd etdi ki, alternativ Ağdam-Xankəndi yolundan istifadə təklifinin Avropa İttifaqı və Beynəlxalq Qırmızı Xaç Komitəsi tərəfindən dəstəklənməsinə baxmayaraq, Ermənistan bu təkliflərə qarşı çıxır və təxribatlara əl atır. Azərbaycan Prezidenti Ermənistan tərəfinin atdığı təxribatçı addımların sülh prosesinə maneçilik törətdiyini bildirdi və xüsusi olaraq vurğuladı ki, Ermənistan silahlı qüvvələrinin Azərbaycanın suveren ərazisində qanunsuz olaraq qalmaqda davam etməsi bölgədə hərbi gərginlik mənbəyidir. Jurnalistin Ermənistan vətəndaşlarının diqqətinə hədəflənən sualı ətrafında Azərbaycan Prezidentinin cavabı bir neçə istiqamətdə hədəfli idi. Prezident Azərbaycanın sülh və sabitlik məqsədilə atdığı addımların regionda bütün iştirakçıların maraqlarına cavab verməsi və ən əsası, ölkəmizin regionda sülh və sabitlik üçün səylərinin davamlı etdirəcəyini təkcə Ermənistana deyil, həm də bütün dünya ictimaiyyətinə çatdırdı”, - deyə ekspert qeyd edib.
Bölmənin digər xəbərləri
