SİYASƏT
Prezidentin müsahibəsində verdiyi mesajlar Azərbaycanın inkişafının konsepsiyası sayıla bilər - Deputat
Bakı, 19 aprel, AZƏRTAC
Azərbaycanın iqtisadi qüdrətinin mühüm göstəricilərindən biri də bölgələrin inkişafıdır. Prezident İlham Əliyevin regionların sosial-iqtisadi inkişafı ilə bağlı dövlət proqramlarının icrasını birbaşa diqqətdə saxlaması bu sahədə uğurları şərtləndirən başlıca amillərdən biridir. Hərbi və diplomatik müstəvidə ölkəmizin yüksəlişini təmin edən dövlət başçısı bu gün işğaldan azad olunan ərazilərdə tikinti-quruculuq işləri, “Böyük Qayıdış” Proqramının yerinə yetirilməsi ilə yanaşı, digər bölgələrin də inkişafını daim diqqət mərkəzində saxlayır.
Dünyanın qeyri-sabit siyasi durumu, iqtisadi-sosial böhranın hökm sürdüyü halda Azərbaycanda görülən işlər, inkişaf strategiyası hər kəs tərəfindən heyrətlə qəbul olunur. Bu baxımdan Prezidentin Neftçala və Salyan rayonlarına səfəri də ölkə üzrə geniş inkişaf proqramının tərkib hissəsi idi.
AZƏRTAC xəbər verir ki, bu sözləri Milli Məclisin deputatı, YAP İdarə Heyətinin üzvü Rəşad Mahmudov söyləyib.
Deputat bildirib ki, dövlətimizin başçısının səfəri zamanı açılışı edilən obyektlər həm respublika iqtisadiyyatı, həm də vətəndaşların həyat səviyyəsinin yüksəldilməsi baxımdan böyük əhəmiyyət kəsb edir. Səfər çərçivəsində dövlət başçısının Salyan şəhərində Azərbaycan Televiziyasına müsahibəsi zamanı mühüm mesajlar verməsi də xüsusi diqqət çəkdi. Müsahibədə səslənən fikirlər yerli və xarici politoloqlar tərəfindən böyük maraqla qarşılandı.
Prezident ilk olaraq işğaldan azad olunan ərazilərimizdə genişmiqyaslı və sürətli bərpa-yenidənqurma işlərinə toxunaraq hər şeyin plana uyğun şəkildə getdiyini, işğal dövründə xarabalığa çevrilmiş yaşayış məskənlərimizdə müharibədən dərhal sonra sürətli quruculuq prosesinin başlanıldığını qeyd etdi. Bunun nəticəsi olaraq iki yaşayış məntəqəmiz olan Ağalı və Talış kəndlərində hazırda keçmiş köçkünlərimiz yaşayır. Prezident diqqətə çatdırdı ki, yenidən müasir standartlara cavab verən bu kəndlərin timsalında bütövlükdə gələcək Qarabağın və Şərqi Zəngəzurun simasını görürük. Abad kəndlər, ağıllı idarəetmə prinsipləri əsasında gələcək Qarabağın və Şərqi Zəngəzurun siması yeniləşən Ağalı və Talış kəndləri kimi olacaq.
Dövlətimizin başçısı keçmiş köçkünlərlə bağlı dövlətimizin planlarını şərh edərək ilin sonuna qədər nəzərdə tutulduğundan da artıq - 700-dən çox ailənin Laçın şəhərində yerləşəcəyinin anonsunu verməklə, əslində, Azərbaycan dövlətinin qüdrətini bir daha nümayiş etdirdi. Prezident təkcə Laçında deyil, paralel olaraq Şuşa, Ağdam, Füzuli, Zəngilan və işğaldan azad edilmiş digər yurd yerlərimizdə də quruculuq işlərinə toxunaraq bəyan olunan bütün məqsədlərin həyatda öz əksini tapacağını növbəti dəfə bəyan etdi.
Müsahibədə sülh danışıqları ilə bağlı məsələyə aydınlıq gətirən dövlətimizin başçısı vurğuladı ki, Azərbaycan tərəfindən irəli sürülmüş sülh müqaviləsi beynəlxalq hüququn norma və prinsiplərinə tam uyğun olaraq beş prinsipi ortaya qoymuşdur. Bu prinsiplər ölkələrin suverenliyi, ərazi bütövlüyü və sərhədlərin toxunulmazlığını özündə ehtiva edir. Bütün bunlardan sonra sülh müqaviləsi imzalana bilər və düşünürük ki, Ermənistan ölkəmizin yanaşması ilə razıdır.
Prezident Qarabağda yaşayan erməni əhalisinin əksəriyyətinin Azərbaycan vətəndaşlığını qəbul etməyə hazır olduğunu, lakin separatçıların buna maneə törətdiyini diqqətə çatdırmaqla, bir neçə gün bundan əvvəl Ermənistanda keçirilən ağır atletika üzrə Avropa çempionatının açılış mərasimində nifrət və düşmənçiliyin davamı olaraq dövlət bayrağımızın yandırılmasına da sərt münasibət bildirdi. Qeyd olundu ki, Ermənistan rəhbərliyinin gözü qarşısında belə rəzil hadisənin baş verməsi və buna reaksiya göstərilməməsi onun sübutdur ki, bu çirkin əməlin müəllifi məhz rəsmi İrəvandır. Prezident qətiyyətlə bildirdi ki, bu gün Azərbaycan bayrağı Ağdamda, Füzulidə, Cəbrayılda, Qubadlıda, Zəngilanda, Kəlbəcərdə, Laçında, Şuşada, Hadrutda, Talışda, Suqovuşanda, yüzlərlə işğaldan azad olunmuş kəndlərimizdə, Zəngəzurda dalğalanır. Azərbaycan lideri həmin yerlərdə onlar bayrağımıza nəinki yaxınlaşa bilmir, hətta uzaqdan baxmağa da cəsarətləri yoxdur bəyanatı ilə düşmən ölkəyə yerini göstərməklə yanaşı, bizə azərbaycanlı olmağın xoşbəxtliyini, qürurunu yaşatdı.
Rəşad Mahmudov sonda qeyd edib ki, Azərbaycan Prezidentinin müsahibəsində verdiyi mesajlar tam mənada ölkəmizin gücünün və gələcək hədəflərinin ifadəsi idi. Burda səslənən fikirlər Azərbaycanın geosiyasi maraqlarını açıq şəkildə ortaya qoymaqla, həm də beynəlxalq ictimaiyyətə dövlətimizin siyasi və iqtisadi strategiyasını bəyan etmiş oldu. Bütün məsələlərdə beynəlxalq hüququn normalarını və suveren hüquqlarımızı əsas götürən dövlətimizin başçısı qarşıya qoyulmuş məsələlərdən imtina edilməyəcəyi ilə bağlı qətiyyətini bir daha ortaya qoydu. Prezident İlham Əliyev regionun lider dövləti olaraq Azərbaycan Respublikasının milli maraqlarını qorumaq və hər kəsin bu maraqlarla hesablaşmaq məcburiyyətində olduğunu qəti şəkildə bildirmiş oldu. Bir sözlə, dövlətimizin başçısının verdiyi mesajlar hər şeydən öncə Azərbaycanın inkişafının və qüdrətinin tam mənada konsepsiyası sayıla bilər.