Qafqaz Universitetində 20 Yanvar şəhidlərinin xatirəsi anılmışdır
Bakı, 19 yanvar (AZƏRTAC). Yanvarın 19-da Qafqaz Universitetində 20 Yanvar şəhidlərinin xatirəsini anma mərasimi keçirilmişdir.
AZƏRTAC xəbər verir ki, Azərbaycan Qaçqın və Məcburi Köçkün Gənclər Təşkilatı (AQMKGT) və Qafqaz Universitetinin birgə təşkilatçılığı ilə keçirilən tədbirdə Milli Məclisin deputatları, ziyalılar, AQMKGT-nin üzvləri, tələbələr iştirak etmişlər.
Tədbir iştirakçıları əvvəlcə faciə qurbanlarının xatirəsini bir dəqiqəlik sükutla yad etmişlər.
Azərbaycanın və Türkiyənin dövlət himnlərinin səslənməsi ilə başlayan tədbiri universitetin rektoru Əhməd Saniç açaraq 20 Yanvar faciəsi zamanı milli birliyimizin yalnız Azərbaycan xalqının deyil, bütün türk dünyasının tarixində əhəmiyyətini qeyd etmişdir.
AQMKGT-nin sədri Vüqar Qədirov bildirmişdir ki, 20 Yanvar faciəsinin ildönümünün hər il qeyd olunması Azərbaycan xalqının öz tarixini unutmamasına əyani sübutdur. V.Qədirov vurğulamışdır ki, bu tarixin olduğu kimi gələcək nəsillərə çatdırılmasını təmin etmək ən başlıca məqsədlərimizdən biri olmalıdır.
Tədbirdə digər çıxış edənlər də 20 Yanvar faciəsi qurbanlarının Azərbaycanın istiqlaliyyəti yolunda şəhid olduqlarını və onların işıqlı xatirəsinin xalqımızın qəlbində daim yaşayacağını bildirmişlər.
Sonda tələbələr və şagirdlər 20 Yanvar faciəsinə həsr olunmuş şeirlər söyləmişlər.
Bölmənin digər xəbərləri
