Qahirədə 20 Yanvar faciəsinin ildönümü qeyd edilmişdir
Bakı, 21 yanvar (AZƏRTAC). Azərbaycan Respublikasının Misir Ərəb Respublikasındakı (MƏR) səfirliyindən AZƏRTAC-a verilən məlumatda bildirilir ki, Qanlı Yanvar faciəsinin 21-ci ildönümü Qahirədə də qeyd edilmişdir.
Mərasimdə səfirliyin əməkdaşları, Misirdə təhsil alan azərbaycanlı tələbələr, buradakı Azərbaycan diasporunun üzvləri və mətbuat nümayəndələri iştirak etmişlər.
Tədbiri açan səfir Ş.Abdullayev 1990-cı il yanvarın 20-də sovet dövlətinin Azərbaycan xalqına qarşı həyata keçirdiyi qətliam barədə danışmış, ölkəsinin milli azadlığı və ərazi bütövlüyü uğrunda mübarizəyə qalxmış dinc əhaliyə divan tutmaqla, yüzlərlə günahsız insanı amansızlıqla qətlə yetirməklə Azərbaycan xalqının azadlıq ruhunu boğmaq məqsədi güddüyünü qeyd etmişdir. Ş.Abdullayev vurğulamışdır ki, əksinə 20 Yanvar faciəsindən sonra xalqımızın azadlıq əzmi daha da yüksəlmiş və xalqımızın milli azadlıq mübarizəsi nəticəsində sovet rejimi iflasa uğramış və Azərbaycan öz müstəqilliyini bərpa etmişdir.
Faciəyə yalnız Azərbaycan xalqının ümummilli lideri Heydər Əliyevin yenidən hakimiyyətə qayıdışından sonra hüquqi-siyasi qiymət verildiyini diqqətə çatdıran səfir Azərbaycanın milli müstəqillik tarixində və bugünkü inkişafı və firavan gələcəyində ulu öndərin əvəzedilməz rolunu xüsusi qeyd etmişdir. Heydər Əliyevin siyasi xəttini uğurla davam etdirən Prezident İlham Əliyevin rəhbərliyi altında aparılan islahatlar, dövlət quruculuğunda atılan ardıcıl addımlar sayəsində bu gün Azərbaycanın dinamik inkişaf edən bir dövlət kimi regional liderə çevrildiyi tədbir iştirakçılarının diqqətinə çatdırılmışdır.
Ş.Abdullayev hər il Qanlı Yanvar hadisələrinin ildönümünün Azərbaycanda dövlət səviyyəsində qeyd olunduğunu və ölkənin müstəqilliyi, azadlığı və firavan gələcəyi naminə canlarını qurban vermiş şəhidlərin xatirəsinin xalqımız tərəfindən əziz tutulduğunu vurğulamışdır.
Şəhidlərin əziz xatirəsi tədbir iştirakçıları tərəfindən bir dəqiqəlik sükutla anılmışdır.
Mərasimdə çıxış edən “Azərbaycan” jurnalının baş redaktoru Məhəmməd Sələmə həmin hadisələrin Misir ictimaiyyəti tərəfindən etiraz və hiddətlə qarşılandığından bəhs etmiş, özünün faciə baş verdiyi zaman Misir mətbuatında geniş məqalə dərc etdirərək, törədilmiş cinayətlərə görə məsuliyyət daşıyan sovet mərkəzi hakimiyyətini kəskin şəkildə ittiham etdiyini bildirmişdir.
Tədbirin sonunda 20 Yanvar faciəsini əks etdirən fotostend, kompakt disklər iştirakçıların diqqətinə təqdim olunmuşdur.
Eyni zamanda, 20 Yanvar faciəsinin ildönümü ilə əlaqədar, Misirin və ərəb dünyasının aparıcı “Əl-Əhram” və “Əl-Youm Əl-Səbe” qəzetlərində və digər yerli kütləvi informasiya vasitələrində Ş.Abdullayevin geniş məqalələri dərc edilmişdir.
Bu məqalələrdə 80-ci illərin sonlarından başlayaraq, Ermənistan SSR-nin Azərbaycanın Dağlıq Qarabağ regionuna ərazi iddiaları, Sovet hakimiyyətinin birtərəfli qaydada Ermənistanı dəstəkləməsinə qarşı Azərbaycan xalqının etirazı və totalitar sovet rejiminə qarşı milli azadlıq mübarizəsini boğmaq məqsədilə SSRİ rəhbərliyi tərəfindən 20 yanvar qırğınının törədildiyi qeyd olunmuşdur.
Bölmənin digər xəbərləri
