QAHİRƏDƏ XOCALI QƏTLİAMININ 18-Cİ İLDÖNÜMÜ İLƏ ƏLAQƏDAR ELMİ SİMPOZİUM KEÇİRİLMİŞDİR
Qahirə, 26 fevral (AZƏRTAC). Xocalı faciəsinin 18-ci ildönümü ilə əlaqədar Azərbaycanın Misir Ərəb Respublikasındakı səfirliyinin və Misirin Ayn Şəms Universiteti Yaxın Şərq Tədqiqatları və Gələcək Araşdırmalar Mərkəzinin birgə təşkilatçılığı ilə “Xocalı soyqırımı və dövlət terrorunun günahlandırılması” adlı elmi simpozium keçirilmişdir.
Tədbirdə Qahirədə akkreditə olunmuş diplomatik korpusun nümayəndələri, Misirdə yaşayan Azərbaycan icmasının üzvləri, burada təhsil alan həmyerlilərimiz, Misirin Ayn Şəms, Zaqaziq universitetləri və Asiya Tədqiqatları İnstitutunun professor-müəllim heyəti, yerli kütləvi informasiya vasitələrinin nümayəndələri iştirak etmişlər.
Əvvəlcə “Xocalıya ədalət!” adlı rep üslublu mahnının klipi nümayiş etdirilmiş, ermənilərin Xocalıda törətdikləri vəhşiliklərdən bəhs edən fotoşəkillər və faciə ilə bağlı “Xocalı uşaqların gözü ilə” adlı uşaq rəsmlərindən ibarət fotostendlər, kitab, disk və broşürlər təqdim olunmuşdur.
Tədbiri səfir Faiq Bağırov açmış, Xocalı faciəsi qurbanlarının xatirəsi bir dəqiqəlik sükutla yad edilmişdir. Sonra iştirakçılar Xocalı hadisələrindən bəhs edən “Məhv edilmiş şəhər” adlı sənədli filmə baxmışlar.
Mərkəzin direktoru, professor Camal Şaqra çıxış edərək, simpoziumun keçirilməsinin səbəb və məqsədlərini açıqlamış, Xocalı hadisələri haqqında iştirakçılara geniş məlumat vermişdir.
Sonra səfirliyin ikinci katibi E.Şahhüseynov çıxış edərək, “Xocalıya ədalət!” beynəlxalq kampaniyasının internet səhifəsi - www.JusticeforKhojaly.org saytındakı slaydların təqdimatını keçirmişdir.
Misirin Asiya Tədqiqatları İnstitutunun təsisçisi, professor Rafət Əl-Şeyx məruzəsində faciənin tarixi, səbəb və nəticələri barədə danışmış, soyqırımı mövzusunu müxtəlif aspektlərdən təhlil etmişdir. Qocaman tədqiqatçı alim Xocalı hadisələrinin şahidlərinin dilindən və habelə soyqırımı ilə bağlı həmin günlərdə beynəlxalq mətbuatda yazılarından insanı sarsıdan, baş vermiş faciəni bütün dəhşəti ilə göz önündə canlandıran sitatlar gətirmişdir.
Universitetinin professoru, mərkəzin üzvü, görkəmli türkoloq Safsafi Əl-Quturi məruzəsində Azərbaycan xalqının qədim dövrlərdən bəri bu torpaqlarda yaşadığını, bu ərazilərdə bir çox Azərbaycan dövlətlərinin qurulduğunu qeyd edərək, bütün dünyaya səs salmış Səfəvilər dövlətinin sırf Azərbaycan dövləti olduğunu bəyan etmişdir. Türkoloq alim bölgədə süni şəkildə yerləşdirilmiş ermənilərin azərbaycanlılara qarşı qaldırdıqları torpaq iddialarının tamamilə əsassız olduğunu tarixi faktlarla sübut etmişdir.
İSESKO-nun Avropa üzrə baş əlaqələndiricisi doktor Salah Al-Caafaravi çıxış edərək, Xocalı soyqırımının dünya ictimaiyyətinin diqqətinə çatdırılması və beynəlxalq səviyyədə tanınması istiqamətində İKT və İSESKO tərəfindən görülən məqsədyönlü fəaliyyətdən və əldə olunmuş nəticələrdən bəhs etmişdir.
Zaqaziq Universitetinin professoru Məhəmməd Rifat Əl-İmam Ermənistan-Azərbaycan, Dağlıq Qarabağ münaqişəsi barədə ətraflı məruzə etmiş, ermənilərin Dağlıq Qarabağ və digər Azərbaycan ərazilərinin işğalında Xocalı faciəsinin başlanğıc rol oynadığını bildirmiş, işğal nəticəsində Azərbaycana külli miqdarda ziyan dəydiyini, 20 faizdən artıq ərazinin qəsb olunduğunu və bir milyondan artıq insanın ev-eşiklərini itirərək öz vətənlərində məcburi köçkün vəziyyətinə düşdüyünü bildirmişdir. Misirli alim ermənilərin Xocalı qətliamını məqsədli və planlı şəkildə həyata keçirdiyini xüsusi qeyd edərək, intiqam məqsədi ilə törədilmiş bu faciənin erməni irqçilərinin sülhsevər Azərbaycan xalqına qarşı müxtəlif dövrlərdə həyata keçirdikləri soyqırımı siyasətinin tərkib hissəsi olduğunu diqqətə çatdırmışdır.
2009-cu ildə İslam Konfransı Gənclər Forumunun mədəniyyətlərarası dialoq üzrə baş koordinatoru Leyla xanım Əliyevanın təşəbbüsü ilə elan edilmiş “Xocalıya ədalət!” beynəlxalq kampaniyasının misirli əlaqələndiricisi Məhəmməd Sələmə çıxış edərək, kampaniyanın ötən bir il ərzində fəaliyyəti və internet səhifəsi - www.JusticeforKhojaly.org haqqında iştirakçılara ətraflı məlumat vermişdir.
Tədbirin sonunda əlaqələndirici tərəfindən kampaniyanın yeni müraciəti təqdim edilmişdir.
Bölmənin digər xəbərləri
