Qanunsuz ov edənlərin hər biri 1000 manat məbləğində cərimə olundu
Bakı, 24 noyabr, AZƏRTAC
Ekologiya və Təbii Sərvətlər Sərvətlər Nazirliyi (ETSN) və Daxili İşlər Nazirliyi tərəfindən qanunsuz ov hallarının qarşısının alınması məqsədi ilə noyabrın 19-dan 23-dək keçirilmiş reydlərin nəticələri açıqlanıb.
ETSN-in mətbuat xidmətindən AZƏRTAC-a verilən məlumata görə,
reyd zamanı Qazax rayonunun Yuxarı Salahlı kəndi ərazisində ovla məşğul olan kənd sakini Nicat Eyyublu saxlanılaraq ondan 1 ov tüfəngi, 2 patron götürülüb. Qanun pozucusu barəsində akt və protokol tərtib edilərək 1000 manat məbləğində cərimə olunub. Zərdab rayonunun Qarasu çayı sahilində qanunsuz ov edən Ucar şəhər sakinləri Heydər Qarayev və Kamil Əhmədovdan isə 2 ov tüfəngi, 43 patron götürülərək barələrində akt və protokol tərtib olunub və hər biri 1000 manat məbləğində cərimə edilib.
Qax Dövlət Təbiət Yasaqlığının ərazisində ov edən Zaqatala rayonu Tala kənd sakini Ramiz Qardaşov saxlanılaraq ondan 1 ov tüfəngi və 29 patron götürülüb. Təqsirkar şəxs barəsində qanunamüvafiq qaydada akt və protokol tərtib edilərək 1000 manat məbləğində cərimə olunub.
Füzuli rayonunun Qazaxlı kəndi ərazisində ov edən həmin kəndin sakinləri Nemət Qasımov və Məqsəd Namazovdan 2 ov tüfəngi və 4 patron götürülüb. Qanun pozucularının hər biri 1000 manat məbləğində cərimə edilib.
Reydlər davam etdirilir.
Bölmənin digər xəbərləri
