Qanunsuz yolla ovlanmış çöl quşları yandırılmışdır
Bakı, 1 aprel (AZƏRTAC). Ekologiya və Təbii Sərvətlər Nazirliyinin (ETSN) Ətraf Mühitin Mühafizəsi Departamentinin əməkdaşları tərəfindən yanvarın 1-dən martın 27-dək ölkə ərazisində “Ovçuluq haqqında” Azərbaycan Respublikası Qanununun tələblərinə əməl olunması vəziyyətini yoxlamaq məqsədi ilə keçirilən reydlərin nəticələri açıqlanmışdır.
ETSN-dən AZƏRTAC-a bildirilmişdir ki, ümumilikdə qanunsuz ovla məşğul olan 59 nəfərdən 54 ov silahı, 134 patron götürülmüş və həmin şəxslərə 43 000 manat məbləğində cərimə tətbiq olunmuşdur.
Bundan başqa, nazirliyin əməkdaşları Bakı şəhərindəki “Top Qapısı”, “Cənnət Gəncə”, “Şəki” restoranlarında, Kürdəmir rayonu dəmiryolu stansiyasının yaxınlığındakı kafedə, Biləsuvar rayonu Xıllı kəndi və Hacıqabul rayonu Padar kəndlərinin yaxınlığından keçən yolun kənarında qanunsuz yolla ovlanmış çöl quşlarının satıldığını aşkar etmişlər. Qanunu pozanlar inzibati qaydada cərimə olunmuş, ov quşları isə yandırılmışdır.
Eyni zamanda, Bərdə rayonu ərazisində qanunsuz ov edən 5 nəfərin avtomobili saxlanılmışdır.
Bölmənin digər xəbərləri
