QƏBƏLƏDƏ SOYQIRIMI QURBANLARININ XATİRƏSİ SİLSİLƏ TƏDBİRLƏRLƏ YAD EDİLMİŞDİR
Qəbələ, 31 mart (AZƏRTAC). Martın 31-də Qəbələdə Azərbaycanlıların soyqırımı gününə həsr olunmuş toplantı keçirilmişdir.
Tədbirdə soyqırımı qurbanlarının əziz xatirəsi bir dəqiqəlik sükutla yad edilmişdir.
Rayon İcra hakimiyyəti başcısının birinci müavini Abil Ağasəfov bildirmişdir ki, son iki əsrdə ermənilərin Azərbaycan xalqına qarşı düşünülmüş şəkildə həyata keçirdiyi genişmiqyaslı qanlı soyqırımı hadisələri nəticəsində yüzlərlə yaşayış məntəqəsi yerlə-yeksan edilmiş, yüz minlərlə azərbaycanlı qəddarcasına öldürülmüş, bir milyondan çox insan evindən, el-obasından didərgin düşmüşdür.
Toplantıda çıxış edən tarix-diyarşünaslıq muzeyinin direktoru Xalis Məmmədov, Məmmədağalı kənd məktəbinin müəllimi Elşad Abdurahmanov, şəhər sakini Məmmədxan Məmmədağayev, məcburi köçkün Əhəd Həsənov ermənilərin azərbaycanlılara qarşı düşünülmüş, planlı surətdə həyata keçirdiyi soyqırımı siyasətinin ayrı-ayrı mərhələləri və həmin qanlı hadisələri əks etdirən tarixi faktları tədbir iştirakçılarının diqqətinə çatdırmışlar.
31 Mart - Azərbaycanlıların soyqırımı günü ilə əlaqədar Qəbələ rayonunun mədəniyyət müəssisələrində tədbirlər keçirilmiş, orta məktəblərdə xüsusi dərslər təşkil olunmuşdur.
Bölmənin digər xəbərləri
