REGİONLAR
Qəbul imtahanı Bərdədə 4 mərkəzdə təşkil olunub
![Qəbul imtahanı Bərdədə 4 mərkəzdə təşkil olunub](/files/2023/2/1200x630/16888182651951151343_1200x630.jpg)
Bərdə, 8 iyul, Tahir Ağaməmmədov, AZƏRTAC
Dövlət İmtahan Mərkəzi tərəfindən Bərdə rayonunda III ixtisas qrupu üzrə ali təhsil müəssisələrinə keçirilən qəbul imtahanlarında 1144 nəfər abituriyent iştirak edib. İmtahanlar Bərdə şəhərində 4 mərkəzdə təşkil olunub.
Dövlət İmtahan Mərkəzinin Bərdə regional bölməsindən AZƏRTAC-ın bölgə müxbirinə bildirilib ki, imtahanın idarə olunmasına 4 ümumi rəhbər, 13 imtahan rəhbəri, 91 nəzarətçi-müəllim, 13 buraxılış rejimi əməkdaşı cəlb olunub.
İmtahan bütün binalarda saat 10:00-da başlanıb və 3 saat davam edib. İmtahan prosesinin idarə olunması üçün DİM-də operativ qərargah fəaliyyət göstərib, müntəzəm olaraq imtahanın keçirildiyi binalarla əlaqə saxlanılıb və imtahan prosesinin gedişi nəzarətdə olub. Bütün binalarda imtahan təlimata uyğun şəkildə keçirilib, şagirdlərin öz bilik səviyyələrini nümayiş etdirmələri üçün zəruri şərait yaradılıb.
İyulun 10-dan etibarən DİM-də imtahan protokollarının və cavab vərəqlərinin emalı aparılacaq.