CƏMİYYƏT
Qida Təhlükəsizliyi Agentliyinin könüllüləri ərzaq mağazalarında maarifləndirmə tədbirləri aparıb
Bakı, 13 oktyabr, AZƏRTAC
“Könüllü Qida Nəzarətçisi” proqramının iştirakçıları koronavirusla bağlı maarifləndirmə tədbirlərini davam etdirirlər.
Qida Təhlükəsizliyi Agentliyinin İnformasiya təminatı və innovativ həllər şöbəsindən AZƏRTAC-a bildirilib ki, oktyabrın 13-də agentliyin könüllüləri paytaxtın Yasamal rayonunda yerləşən ərzaq satışı müəssisələrində maarifləndirmə tədbirləri aparıblar. Proqramının iştirakçıları agentlik tərəfindən hazırlanan maarifləndirici məlumatları istehlakçılara paylayıblar. Həmçinin könüllü qida nəzarətçiləri ərzaq mağazaları müəssisələrində vətəndaşlarla koronavirusdan qorunmağın yolları, kassaların qarşısında növbə zamanı 2 metrlik məsafənin saxlanılması, tibbi maskadan istifadənin önəmi ilə bağlı tövsiyələri istehlakçıların nəzərinə çatdırıblar.
Könüllü qida nəzarətçiləri karantin rejimi dövründə koronavirusun (COVID-19) profilaktikasına dair Nazirlər Kabineti tərəfindən təsdiq olunmuş metodiki göstərişlərin tələbləri ilə bağlı istehlakçıları tanış ediblər. Könüllü qida nəzarətçiləri tibbi maskasız ərzaq mağazaları və ictimai iaşə müəssisələrinə daxil olan şəxslərə maska və əlcəklər təqdim edib, fərdi mühafizə vasitələrinin virusdan qorunmaqda əhəmiyyətini onların diqqətinə çatdırıblar.
Qeyd edək ki, koronavirus (COVID-19) infeksiyasının yayılmasının qarşısının alınması məqsədilə ölkəmizdə tətbiq olunan xüsusi karantin rejimi dövründə Qida Təhlükəsizliyi Agentliyi tərəfindən əhalinin sağlamlığının qorunması, təhlükəsiz qida məhsulları ilə təmin edilməsi istiqamətində mütəmadi olaraq ictimai iaşə müəssisələri, həmçinin ərzaq satışı məntəqələrində maarifləndirmə xarakterli reydlər həyata keçirilir, sahibkarlıq subyektləri, işçi heyət və istehlakçılar xəstəliyin profilaktikası, virusdan qorunmaq yolları barədə ətraflı məlumatlandırılırlar.