QIRĞIZ-TÜRK MANAS UNİVERSİTETİNDƏ XOCALI SOYQIRIMI QURBANLARININ XATİRƏSİNİ ANMA MƏRASİMİ KEÇİRİLMİŞDİR
Bişkek, 24 fevral (AZƏRTAC). Fevralın 24-də Azərbaycanın Qırğızıstandakı səfirliyinin və Qırğız-Türk Manas Universitetinin birgə təşkilatçılığı ilə bu təhsil ocağında Xocalı soyqırımı qurbanlarının xatirəsini anma mərasimi keçirilmişdir.
Tədbirdə universitetin professor-müəllim heyəti, tələbələr, qeyri-hökumət təşkilatlarının nümayəndələri, Qırğızıstanda fəaliyyət göstərən milli mədəniyyət mərkəzlərinin rəhbərləri, soydaşlarımız, jurnalistlər iştirak etmişlər.
Soyqırımı qurbanlarının xatirəsi bir dəqiqəlik sükutla yad edilmişdir.
Səfirliyimizin müşaviri İlqar Cabarov Xocalı soyqırımının XX əsrin ən dəhşətli faciələrindən biri olduğunu bildirmiş, erməni cəlladları və onların havadarları olan kecmiş sovet ordusunun 366-cı motoatıcı alayı tərəfindən törədilmiş vəhşiliklər, meyitlərin təhqir edilməsi, əsirlərimizə amansız işgəncələr verilməsi barədə danışmışdır.
Universitetin prorektoru, professor Qasım Qaraxan, kommunikasiya və ictimaiyyətlə əlaqələr bölməsinin dekanı professor Bayram Kaya, digər müəllimlər və tələbələr Xocalı soyqırımının bəşəriyyətin ən ağır cinayətlərdən biri olduğunu vurğulamış, erməni terrorçuları tərəfindən azərbaycanlılara qarşı torədilən cinayətləri kəskin şəkildə pisləmişlər.
Paytaxtdakı “Azəri” Azərbaycan Mədəniyyət Mərkəzinin sədri Akif Allahverdiyev, Türkdilli Dövlətlərin Siyasətinə Dəstək Fondunun prezidenti Nüsrət Məmmədov çıxış edərək, Xocalı şəhərinin müdafiəçiləri və dinc sakinlərinə qarşı törədilmiş soyqırımın təkcə Azərbaycan xalqına deyil, bütün insanlığa qarşı yönəldilmiş ən ağır cinayətlərdən biri olduğunu bildirmişlər.
Sonra Nüsrət Məmmədov Azərbaycanla bağlı fond tərəfindən Bişkekdə çap etdirilmiş kitablar - professor Mir Cəlalın “Bir gəncin manifesti” povesti, Azərbaycan Prezidenti Administrasiyasının rəhbəri, akademik Ramiz Mehdiyevin “Azərbaycanlılara qarşı soyqırımı gerçəklikləri”, “Gələcəyin strategiyasını müəyyənləşdirərkən: modernləşmə xətti”, Azərbaycan Milli Elmlər Akademiyası Tarix İnstitutunun direktoru, akademiyanın müxbir üzvü Yaqub Mahmudovun elmi redaktorluğu ilə hazırlanmış “Ermənilərin Azərbaycan torpağındakı əməlləri haqqında tarixi faktlar”, Qafar Əliyevin ulu öndər Heydər Əliyev haqqında yazdığı “Müasir Azərbaycanın banisi, xilaskarı və qurucusu” kitabını və digər nəşrləri universitetin rəhbərliyinə təqdim etmişdir.
Tədbirin sonunda Xocalı soyqırımından bəhs edən “Məhv olunmuş şəhər” filmi nümayiş etdirilmiş, universitetin foyesində Xocalı faciəsini əks etdirən fotosərgi açılmışdır.
Faciə ilə əlaqədar hazırlanmış məlumatlar toplusu Qırğızıstanın Prezidenti Aparatı, hökuməti, Joqorku Keneş (parlament) rəhbərliyi, deputatlar, Xarici İşlər Dövlət Nazirliyi, Diplomatik Akademiya, Qırğızıstan Milli Kitabxanası, ölkədə akkreditə olunmuş səfirlik və nümayəndəliklər, yerli və xarici kütləvi informasiya vasitələri arasında paylanılmışdır.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
