QSC neft şlamının emalı və zərərsizləşdirilməsi sahəsində tədbirlər həyata keçirir
Bakı, 26 may (AZƏRTAC). “Ekol Mühəndislik Xidmətləri” Qapalı Səhmdar Cəmiyyəti (QSC) 2007-ci ildə İsveçrənin Alfa-Laval şirkətinin, gücü 30 kubmetr/saat olan 2 ikifazalı dekantor qurğusunu almış, elə həmin ildən “Bibiheybətneft” NQÇİ-nin mədən ərazisində, Heydər Əliyev adına Bakı və “Azərneftyağ” neft emalı zavodlarının (NEZ) istehsalat sahələrində uzun illər yığılıb qalmış neft şlamının emalına və zərərsizləşdirilməsinə başlamışdır. Bu da ərazinin ekoloji vəziyyətinin yaxşılaşmasına müsbət təsirini göstərmişdir.
QSC-dən AZƏRTAC-a verilən məlumata görə, may ayında “Azərneftyağ“ NEZ-in ərazisində olan “Alfa-Laval” dekantor qurğusunda təmir-profilaktika işləri aparılmış, qurğunun ötürücü nasosları yenisi ilə əvəz edilmiş və istismara buraxılmışdır. Bu günlərdə analoji işlər QSC-nin Heydər Əliyev adına BNEZ-in ərazisində istismarda olan qurğusunda da yerinə yetiriləcəkdir.
Hazırda QSC-də Hollandiya istehsalı, məhsuldarlığı 20 kubmetr/saat olan üçfazalı modul dekantor qurğusunun istismara verilməsi istiqamətində hazırlıq görülür. Qurğu üçün transformator binası tikilmiş və beton platforma hazırlanmışdır. Yaxın günlərdə qurğunun quraşdırılmasına başlanılacaqdır. Bu qurğunun istismara verilməsi ilə neft şlamının emalı və zərərsizləşdirilməsi təkmilləşəcək və məhsuldarlıq xeyli artırılacaqdır.
Bölmənin digər xəbərləri
