Raymonda Balnene: Bakı ilbəil gözəlləşir və müasirləşir
Vilnüs, 7 fevral (AZƏRTAC). Bu il yanvarın ortalarında Litva Dövlət Turizm Departamentinin və Litvanın Azərbaycandakı səfirliyinin təşkilati dəstəyi ilə Bakıda “Kəhrəba Litva” adlı layihənin təqdimat mərasimi keçirilmişdir.
Litva Dövlət Turizm Departamentinin baş direktoru Raymonda Balnene AZƏRTAC-ın müxbiri ilə söhbətində qeyd etmişdir ki, “Kəhrəba Litva” layihəsinin Bakıda keçirilən təqdimat mərasimində Azərbaycanın turizm operatorlarına 2014-cü ildə Litvanin turizm sektorunda gözlənilən yeniliklər və BMT yanında Dünya Ticarət Turizm Təşkilatı tərəfindən dəstəklənmiş “Dünya Kəhrəba yolu” adlı beynəlxalq layihə haqqında məlumat verilmişdir. R.Balnene deyir: “Təqdimat mərasimində kəhrəba məhsullarının dequstasiyası keçirilmişdir. Axı, kəhrəba turşusundan çay, müxtəlif cövhərlər, konfet, alma pendiri istehsalında istifadə edilə bilər. Biz Litvada ailəvi istirahət və sanatoriya müalicəsi üçün nəzərdə tutulan kurortlar haqqında məlumat verdik”.
Raymonda Balnene diqqətə çatdırmışdır ki, Litva tərəfi hazırda Naftalan şəhərinin və onun ətrafındakı rayonların kurort kimi inkişaf etdirilməsi sahəsində Azərbaycanla təcrübə mübadiləsi aparır. Naftalanın nadir təbii müalicəvi resursları müasir kurortun inkişaf etdirilməsi üçün müstəsna əlverişli şərait yaradır. Litva Turizm Departamenti Baltikyanı bölgənin incisi sayılan şəfalı bulaqlar kurortu Druskininkay kurortu kimi Naftalan kurortunda da əhaliyə bütün il ərzində xidmət göstərilməsinə nail olmaq məqsədini qarşıya qoymuşdur. R.Balnene deyir ki, Litva tərəfi Naftalan bölgəsində turizm klasterinin və bu ərazinin kompleks inkişafına kömək edə bilər.
R.Balnene diqqətə çatdırmışdır ki, 2013-cü ildə Azərbaycandan Litvaya turist axını 55 faiz artmışdır. Bununla belə, Dövlət Turizm Departamentinin rəhbərinin fikrincə, “turizm sahəsində əlaqələrin inkişaf etdirilməsi üçün Litva ilə Azərbaycan arasında birbaşa aviareys açılması zəruridir. Təbii ki, birbaşa aviareys olmasa turizm axınını maksimum həddə çatdırmaq ehtimalı azdır”.
Litva Dövlət Turizm Departamentinin baş direktoru Raymonda Balnene Bakı haqqında təəssüratlarını bölüşərək demişdir: “Mən Azərbaycanın paytaxtında tez-tez oluram və hər dəfə Bakı şəhərinin simasının sürətlə dəyişməsi məni heyrətləndirir. Bakı ilbəil gözəlləşir və müasirləşir, şəhərdəki güllü bağçalar, kompozisiyalar, prospektlərin zövqlə tərtib olunması göz oxşayır. İnfrastrukturun inkişafına qoyulan sərmayənin həcminə həsəd aparmağa dəyər. Mən həm də Azərbaycanın gözəl paytaxtında tarixdə ilk dəfə keçiriləcək Avropa olimpiya oyunlarına hazırlıq işlərinin şahidi olmuşam”.
Nigar Cəfərli
AZƏRTAC-ın xüsusi müxbiri
Vilnüs
Bölmənin digər xəbərləri
