“Red Bull” Aleks Palouya maraq göstərir?
Bakı, 26 avqust, AZƏRTAC
Atlantik okeanının o tayında iddia olunur ki, “Red Bull Racing” Aleks Palouya maraq göstərir.
AZƏRTAC xəbər verir ki, Amerika mətbuatının yazdığına görə, dördqat “IndyCar” çempionu Maks Ferstappenin mümkün komanda yoldaşı kimi nəzərdən keçirilir.
“Chip Ganassi Racing” (CGR) komandasının ispan pilotu son beş ildə dörd titul qazanaraq Amerika seriyasında açıq-aşkar dominantlıq edir. O, dəfələrlə bildirib ki, Formula 1-ə keçid onun yaxın planlarına daxil deyil. Lakin İndianapolisdə nəşr olunan “Indy Star” qəzeti vəziyyətin dəyişə biləcəyini iddia edir. Nəşr “danışıqların gedişi barədə birbaşa məlumatı olan” mənbələrə istinad edir.
Bununla belə, qeyd olunur ki, hələlik danışıqlar prosesinin hansı mərhələdə olduğu məlum deyil. Amma Palouya birbaşa sual verildikdə, o qəti şəkildə bildirib ki, özünün menecmenti ilə “Red Bull Racing” arasında danışıqların getdiyi barədə ilk dəfə eşidir və şəxsən belə bir prosesdə iştirak etmir.
Eyni şeyi “Indy Star” müxbirinə 28 yaşlı pilotun meneceri Rocer Yasukava da deyib. CGR nümayəndəsi isə əmin edib ki, Aleks Palounun bu komanda ilə qüvvədə olan müqaviləsi var və o, gələcəkdə də 10 nömrəli avtomobili idarə edəcək.
Bununla belə, qəzetin məlumatına görə, müqavilədə vaxtından əvvəl pozulma imkanı nəzərdə tutulub, amma bunun üçün yüksək məbləğdə təzminat ödənilməlidir.
Bu, Palouya başqa komandaların maraq göstərdiyi ilk hal deyil. 2022-ci ildə Aleks “McLaren”ə keçmək istəsə də, iş məhkəməyə qədər gedib çıxmış və ABŞ məhkəməsi “Chip Ganassi Racing”in xeyrinə qərar vermişdi. Nəticədə Palou komandada qaldı və 2023-cü ildə “IndyCar” seriyasında ikinci titulunu qazandı.
Lakin elə həmin il Palou yenidən “McLaren Racing”ə keçməyə cəhd göstərdi və bir müddət Formula 1-in Britaniya komandasının ehtiyat pilotu da hesab olundu. Ancaq bu plan da məhkəmə çəkişməsinə çevrildi. Bu dəfə iddianı “McLaren” qaldırdı, çünki Aleksin müqaviləni pozduğunu və bunun onlara on milyonlarla dollar zərər vurduğunu hesab edirdi. Məhkəmə işi Böyük Britaniyada hələ yekunlaşmayıb və proses altı həftədən sonra baş tutmalıdır.
Bölmənin digər xəbərləri
