Regionların inkişafının təmin edilməsi Azərbaycan Prezidentinin siyasətinin təməlində vətəndaşların rifahının dayandığını göstərir - Deputat
Bakı, 8 avqust, AZƏRTAC
Beynəlxalq münasibətlər sistemində baş verən proseslər dünyada qütbləşmənin dərinləşməsinə gətirib çıxarıb. Rusiya-Ukrayna müharibəsi nəticəsində tətbiq olunmuş sanksiyalar dünya iqtisadiyyatında yeni böhran meyilləri yaradıb, enerji və təbii resursların idxal mənbələrində, daşınma marşrutlarında çatlar əmələ gətirib. Hazırda inkişaf etmiş ölkələrin iqtisadiyyatları böhranla üzləşib və bu ölkələrdə iqtisadi artımlar, valyuta ehtiyatları azalmağa başlayıb, dövlət borclarının həcmi isə hər gün artır. Qonşu dövlətlərin milli valyutaları xarici təzyiqlərə davam gətirə bilməyərək ucuzlaşır. Dünya iqtisadiyyatı çətinliklə üzləşdiyi dövrdə iqtisadi bağlantıların yaradılması və yeni mənbələrdən enerji resurslarının idxal edilməsi qaçılmaz olub. Azərbaycan özünün yerləşdiyi geosiyasi mövqeyindən səmərəli istifadə edərək yeni iqtisadi imkanlar təqdim etməklə dünya siyasi sisteminin aparıcı aktoruna çevrilib. İllər əvvəl həyata keçirməyə başladığımız iqtisadi siyasət və beynəlxalq tranzit marşrutlarının yaradılması bu gün ölkəmizin iqtisadiyyatının dayanıqlı olmasına və möhkəmlənməsinə yol açıb. Azərbaycan xarici dövlət borcunu azaldır, valyuta ehtiyatlarını artırır. Eyni zamanda, milli valyutamızın sabitliyi qorunub saxlanılır və ölkənin inkişafı ilə bağlı Dövlət proqramlarının uğurlu icrası davam etdirilir.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
Deputat bildirib ki, 44 günlük Vətən müharibəsində erməni işğalından azad etdiyimiz ərazilərdə meqalayihələr uğurla icra olunur. Ermənilərin otuz ildə dağıdaraq yerlə-yeksan etdikləri yaşayış məntəqələri dövlətimizin başçısı tərəfindən təsdiqlənmiş Böyük Qayıdışa dair Dövlət Proqramının uğurlu icrası sayəsində müasir şəkildə yenidən qurularaq öz sakinlərini qarşılamaqdadır. Bu gün Lüksemburqdan və Livan kimi ölkələrdən daha böyük əraziləri Azərbaycan dövləti xaricdən heç bir maliyyə dəstəyi almadan, yalnız öz iqtisadi imkanları hesabına bərpa edir. Otuz il ağır məcburi köçkünlük həyatı yaşayan insanların firavan gələcəyə qovuşması üçün dövlətimiz milyardlarla manat vəsait sərf edir. Artıq işğaldan azad olunmuş bir neçə yaşayış məntəqəmiz öz sakinlərini qəbul edib və orada həyat canlanmağa başlayıb.
“İşğaldan azad olunmuş ərazilərin bərpasının böyük maliyyə resursları tələb etməsinə baxmayaraq, ölkəmizin digər regionlarının sosial-iqtisadi inkişafı ilə bağlı layihələr də davam etdirilir. 2004-cü ildən icrasına başlanılan regionların sosial-iqtisadi inkişafına dair Dövlət proqramlarının üçü uğurla yerinə yetirilib, dördüncü Proqramın icrası isə davam edir.
Avqustun 7-də Prezident İlham Əliyev Şəmkir, Samux, Qazax və Bərdə rayonlarına səfər edərək, bir çox sosial-infrastruktur layihələrinin açılışlarını etdi. Belə ki, bu rayonlarda yeni məktəblər, xəstəxana, yol infrastrukturu, su və kanalizasiya sistemləri yenidən qurulur. Regional DOST Mərkəzi, Peşə Hazırlığı Mərkəzi, istehsal sahələri və digər infrastruktur layihələri istifadəyə verilir. Bu da insanların rahat və firavan yaşayışı üçün yeni imkanlar yaradır. DSX-nin Sərhəd Qoşunlarının “Qazax” Əlahiddə Sərhəd Diviziyasının qarnizon kompleksinin yenidən qurulması sərhəd qoşunlarının yüksək səviyyədə xidmət göstərməsinə əlverişli şərait yaradır. Bu gün Ermənistanın mütəmadi olaraq təxribatlara əl atması sərhəd-mühafizə sisteminin daha da gücləndirilməsini tələb edir. Yeni açılan kompleksin müasir döyüş silahları və texnologiyalarla təchiz olunması ərazi bütövlüymüzün hər bir təhlükədən yüksək səviyyədə qorunmasını təmin edir”, - deyə A.Badamov vurğulayıb.
O əlavə edib ki, Prezident İlham Əliyevin rəhbərliyi və tapşırığı əsasında işğaldan azad edilmiş ərazilərin yenidən qurulması və bərpası ilə paralel olaraq, digər regionların sosial-iqtisadi inkişafı da təmin edilir. Bu amil də dövlətimizin başçısının siyasətinin təməlində vətəndaşların rifahının və təhlükəsizliyinin dayandığını göstərir. Bu gün dünyada sosial-iqtisadi layihələri icra edən dövlətlərin sayı çox azdır. Əsasən dövlətlər dünya iqtisadiyyatının yaratdığı mənfi təsirləri azaltmağa çalışır. Azərbaycan dövləti isə həm dünya iqtisadi böhranı ilə uğurla mübarizə aparır, həm də ölkənin inkişafı və vətəndaşların rifahını yaxşılaşdıran sosial-iqtisadi layihələrin icrasını davam etdirir. Bu, düzgün qurulmuş və gələcəyə hesablanmış sosial-iqtisadi kursun uğurlu olduğunu sübut edir.
Bölmənin digər xəbərləri
