Romada havanın temperaturunda rekord göstərici qeydə alınıb
Roma, 19 iyul, AZƏRTAC
İyulun 18-də İtaliyanın paytaxtı Romada havanın temperaturu 41,8 dərəcə səviyyəsində olmaqla yeni rekord göstəriciyə çatıb. Sardiniya adasında isə temperatur 45 dərəcəyə yüksəlib.
AZƏRTAC xəbər verir ki, Cənubi Avropanın böyük hissəsində müşahidə olunan isti hava dalğası səbəbindən Roma daxil olmaqla İtaliyanın 20 şəhərində “qırmızı” xəbərdarlıq elan edilib. İyulun 19-da isə ölkənin 27 böyük şəhərindən əsasən mərkəz və cənub bölgələrindəki 23 şəhər üçün “qırmızı” xəbərdarlıq elan olunub.
Səhiyyə Nazirliyinin “İstidən qorunaq” kampaniyası çərçivəsində müvafiq halda davranışlar barədə vətəndaşlara mütəmadi məlumat verilir. Mütəxəssislər anomal istilərin bütün əhali üçün təhlükə yaratdığı barədə xəbərdarlıq edib, saat 11:00-18:00-dək zərurət olmadığı təqdirdə evdən çıxmamaq tövsiyə olunub.
Xatırladaq ki, 2022-ci ilin iyununda Romada havanın temperaturu 40,7 dərəcəyə yüksəlib və rekord göstərici qeydə alınıb.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
