Rusiya idman nazirinin müavini: III MDB Oyunlarındakı təşkilatçılıqdan çox razı qaldıq
Qəbələ, 1 oktyabr, AZƏRTAC
Komandamızın bir hissəsi stolüstü tennis üzrə yarışlarda iştirak üçün sentyabrın 24-də Azərbaycana gəldi. Heyətin digər və əsas hissəsi isə artıq sentyabrın 28-də açılış üçün Gəncədə idilər. Biz qarşılanmadan, isti münasibətdən, bir sözlə təşkilatçılıqdan çox razı qaldıq.
AZƏRTAC xəbər verir ki, bu sözləri Rusiyanın idman nazirinin müavini Aleksey Morozov Azərbaycanın ilk dəfə ev sahibliyi etdiyi III MDB Oyunları barədə jurnalistlərə açıqlamasında deyib.
O, bölgələrdə idmançılar üçün yaradılan şəraitin yüksək səviyyədə olduğunu bildirib: “Burada hər şey qüsursuzdur. Ən əsası, nəqliyyat problemimiz yoxdur. İdmançılar, məşqçilər əla hotellərdə yerləşdiriliblər, yeməkləriniz isə möhtəşəmdir. Açılış mərasimi yaxşı mənada hamını təəccübləndirdi. Biz bu barədə komandamızla xoş təəssüratlarımızı bölüşdük. Mərasimdə bir saat yarım ərzində həm Azərbaycanın tarixindən və inkişafından bəhs edildi, həm də bədii hissə yüksək səviyyədə təşkil olundu. Tədbir çox rəngarəng, müasir, hətta innovativ alındı. Hamının çox xoşuna gəldi”.
Nazir müavini Rusiya komandasının Oyunlardakı nəticələrinə də toxunub: “Açığı, gözlədiyimizdən daha çox medal qazandıq. Nəticələri yaxşı qiymətləndiririk. Hər idman növündə maraqlı və iddialı rəqiblər var. Bu turnir idmançılarımız üçün böyük sınaqdır”.
Qeyd edək ki, Oyunlara oktyabrın 8-də yekun vurulacaq.
Bölmənin digər xəbərləri
