Rusiya XİN İran ilə İsrail arasında tammiqyaslı müharibəyə imkan verməməyə çağırıb
Moskva, 13 iyun, AZƏRTAC
Rusiya Xarici İşlər Nazirliyi İsrailin iyunun 13-nə keçən gecə İran ərazisinə endirdiyi zərbələri kəskin şəkildə pisləyib.
AZƏRTAC xəbər verir ki, Moskvanın bəyanatında davam edən eskalasiyadan hədsiz narahatlıq ifadə edilib və bu cür hərəkətlərin yolverilməzliyi vurğulanıb. Rusiya Xarici İşlər Nazirliyi hücumun MAQATE-nin Rəhbərlər Şurasının iclasının ortasında və İran ilə ABŞ arasında dolayı danışıqların raundu ərəfəsində baş verdiyini, Moskvanın fikrincə, sülh yolu ilə nizamlanma səylərini geridə qoyduğunu qeyd edib. Moskva, həmçinin hücumlar zamanı İranda olan MAQATE əməkdaşlarının taleyi ilə bağlı narahatlığını ifadə edib və agentliyi ehtimal olunan nəticələrə obyektiv qiymət verməyə çağırıb.
Bəyanat tərəfləri təmkinli olmağa və vəziyyətin daha da pisləşməsinin qarşısını almağa çağırır. Rusiya tərəfi bir daha vurğulayıb ki, İranın nüvə problemi yalnız diplomatik yolla həll edilə bilər. Bununla əlaqədar olaraq, ABŞ-ın Omanda İranla danışıqların yeni mərhələsinə hazır olduğu xatırladılır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
