RYAZANIN HAKİMİYYƏT ORQANLARI MƏSCİD AÇILMASINA KÖMƏK EDƏCƏKLƏR
AZƏRTAC Müstəqil İslam İnformasiya kanalına istinadla xəbər verir ki, Ryazanın şəhər şurası və meriyası yerli müsəlmanların məscid açmaq üçün almaq istədikləri binanın yenidən qurulmasında onlara kömək göstərmək niyyətindədirlər. Ryazan müsəlmanlarının “Nur” təşkilatının sədri Fərihə Sitdikova bildirmişdir ki, şəhərin hakimiyyət orqanları müsəlmanların Ryazanda məscid tikmək təşəbbüsünü çoxdan dəstəkləsə də, məbədin inşası üçün təklif olunan torpaq sahəsi onları qane etmirdi.
Nəhayət, bu məsələ həllini tapdı. İndi Ryazanın müsəlman icması qarşısında duran əsas məsələ həmin binanın alınması üçün maliyyə vəsaiti toplamaqdır. Bina yenidən qurulduqdan sonra Ryazanda ilk məscid olacaqdır. F.Sitdikovanın sözlərinə görə, bu savab iş üçün maddi yardım göstərməyə hazır olan adamlar tapılmışdır.
Bölmənin digər xəbərləri
