Səbail rayonunda 20 Yanvar şəhidlərinin xatirəsi anılır
Bakı, 19 yanvar (AZƏRTAC). 20 Yanvar faciəsinin 21-ci ildönümü ilə bağlı Səbail rayonunun idarə və təşkilatlarında, ali və orta təhsil müəssisələrində silsilə tədbirlər keçirilir.
Rayon İcra Hakimiyyətindən AZƏRTAC-a bildirmişlər ki, rayonda yaşayan 20 Yanvar şəhidlərinin ailələri və faciə zamanı əlil olmuş sakinlərlə görüş təşkil edilmişdir.
Görüşdə Səbail Rayon İcra Hakimiyyətinin başçısı Asif Əsgərov 20 Yanvarın faciəsinin xalqımızın qan yaddaşına əbədi həkk olunduğunu qeyd etmişdir. Sovet ordusunun qarşısına silahsız, əliyalın çıxaraq canlarından keçmiş şəhidlərimiz müasir tariximizin qəhrəmanlarıdırlar.
Bildirilmişdir ki, ümummilli liderimiz Heydər Əliyev 20 Yanvar faciəsi şəhidlərinin ailələrini, əlil olmuş vətəndaşlarımızı hər zaman diqqət mərkəzində saxlamışdır. Ulu öndərin diqqət və qayğısını bu gün layiqincə davam etdirən Prezident İlham Əliyev Azərbaycanın müstəqilliyi uğrunda həlak olmuş şəhidlərimizin ailələrinə və sağlamlığını itirmiş şəxslərə verilən təqaüd və müavinətləri artırır və bu, gələcəkdə də davam etdiriləcəkdir.
Şəhid ailələri və əlillər adından çıxış edənlər onlara göstərilən diqqət və qayğıya görə dövlətimizin başçısı İlham Əliyevə öz minnətdarlıqlarını bildirmişlər.
Tədbirin sonunda şəhid ailələri və əlillərə maddi yardım göstərilmiş, ərzaq bağlamaları paylanmışdır.
Bölmənin digər xəbərləri
