Şəbnəm Həsənova: Qəbul edilən bütün qərarlar vətəndaş mərkəzli siyasətə xidmət edir
Bakı, 25 mart, AZƏRTAC
Bəşəriyyəti bürüyən koronavirus infeksiyasına qarşı dünya dövlətləri qabaqlayıcı addımlar atmaqda davam edir. Azərbaycan da mövcud tendensiyanı yaxından təqib edən ilk ölkələrdən biridir. Əsas həlledici məqam isə ondan ibarətdir ki, infeksiyanın daha geniş əraziyə yayılmaması məqsədilə ölkədə pandemiya vəziyyəti yaranmadan xüsusi rejimin tətbiqinə başlanılıb. Koronavirus dünya gündəmini zəbt etdiyi ilk gündən məsələnin ciddiliyini və gələcəkdə törədə biləcəyi bütün fəsadların qarşısını almaq məqsədilə Prezident İlham Əliyev uzaqgörənlik nümayiş etdirib və xüsusi tədbirlər planını həyata keçirmək istiqamətində dövlət strukturları qarşısında tələblər qoyub.
Bu sözləri AZƏRTAC-a ölkəmizdə koronavirusa qarşı mübarizə tədbirlərini şərh edən politoloq Şəbnəm Həsənova söyləyib.
Politoloq bildirib ki, dövlətimizin başçısının şəxsi təşəbbüsü ilə bir gündə 200 nəfəs aparatı ölkəyə gətirilib. Bundan əlavə ölkə başçısının göstərişinə əsasən, bir həftə ərzində Azərbaycanda tibbi maska istehsal edən müəssisənin işə başlayacağı gözlənilir. Bütün bu faktlar haqlı olaraq onu deməyə əsas verir ki, bu günə qədər görülmüş bütün işlər vaxtında və dəqiq atılmış addımların nəticəsidir. Bu məqsədlə əhalinin sağlamlığının qorunması və koronavirus infeksiyasına qarşı mübarizənin gücləndirilməsi üçün Koronavirusla Mübarizəyə Dəstək Fondu yaradılıb. Bu cür fondun ilk dəfə Azərbaycanda yaradılması dünyanın digər ölkələrini də mövcud istiqamət üzrə ölkəmizdən nümunə götürməyə sövq edib.
Politoloqun sözlərinə görə, bu fakt onu sübut edir ki, dövlətimizin həyata keçirdiyi yeni təşəbbüslər bütün dünyaya nümunədir. Azərbaycan isə öz növbəsində bir dövlət olaraq qəbul etdiyi qərarların bir çoxunda infeksiya ilə mübarizə istiqamətində dünya dövlətlərinin tövsiyələrinə, təcrübəsinə və hazırda pandemiyanın geniş yayıldığı ölkələrin təcrübəsinə əsaslanıb. Bu çevik və operativ qərar qəbuletmə taktikası ölkəmizə bu mübarizədən minimum ziyanla çıxmağa kömək edəcək.
Ş.Həsənova vurğulayıb ki, bundan əlavə, məsələ istiqamətində milli həmrəyliyi gücləndirmək əsas prioritet məsələdir.
“İndiyə qədər xalq-iqtidar birliyinə söykənərək Azərbaycan bir çox uğurlara imza atıbsa bu həmrəyliyi bir daha nümayiş etdirib bu sınaqdan da üzüağ çıxmalıyıq. Qısa müddət ərzində Fonda 60 milyon manat yığılması qarşılıqlı xalq-iqtidar birliyinə ən gözəl töhfədir. Bu günlərdə həmrəylik, məsuliyyət, birlik bizim əsas şüarımız olmalıdır. Vətəndaş fərd olaraq məsuliyyətli davransa, xüsusi karantin rejiminin qaydalarına əməl etsə bunun özü də həmrəyliyimizə böyük töhfədir. Atılan addımlar iqtisadi, sosial və digər sahələri əhatə edir. Fədakarcasına mübarizə aparan səhiyyə işçilərinin maaşlarının dəfələrlə artırılması, iş adamlarına kompensasiyaların müəyyən olunması bu baxımdan qəbul olunmuş uğurlu qərarlardır. Koronovirus.info az saytında insanların, müəssisə və təşkilatların adlarının əlifba sırası ilə yazılmasının özü də onu göstərir ki, burada məbləğ yox, vətəndaş mövqeyi ən ümdə məsələdir. Vətəndaş mövqeyini ortaya qoymaq həm də ona görə vacibdir ki, Azərbaycan dövlət olaraq bütün zəruri potensiala malikdirsə, xalq olaraq da bu sınaq günlərində bir yumruq kimi vətəndaş mövqeyi və həmrəylik nümayiş etdirməli, Prezident İlham Əliyevin və Birinci vitse-prezident Mehriban xanım Əliyevanın ətrafında daha sıx birləşib, bu mübarizədən də qalib ayrılmağa çalışmalıyıq. Azərbaycan xalqı müdrik xalqdır, çətinliyə sinə gərəcək qədər iradəli xalqdır”, - deyə Ş.Həsənova qeyd edib.
O deyib ki, Prezident İlham Əliyevin və Birinci vitse-prezident Mehriban xanım Əliyevanın bir illik əməkhaqqılarını Koronavirusla Mübarizəyə Dəstək Fonduna ianə etmələri əsil vətəndaşlıq nümunəsidir. Bu baxımdan bu cür fədakar vətəndaş mövqeyi sahibkarları da əhatə etməlidir. İşçilərin ixtisarlarına yol vermək olmaz, çünki cənab Prezident tərəfindən yürüdülən vətəndaş mərkəzli siyasətdə buna qəti yer yoxdur. Bu çətin günlər, həm də xalqımızın nə qədər yardımsevər, geniş ürəyə, yüksək insani keyfiyyətlərə malik olduğunu təsdiqlədi: “Gücümüz həmrəylimizdədir, bu gün bütün dünya görməlidir ki, biz ən çətin məqamlarda belə həmrəy ola bilirik, tək bir amal uğrunda birləşə bilirik. Azərbaycan dərin köklərə malik xalqdır, bizim cəmiyyətimizdə yaşlı nəslə xüsusi ehtiram vardır ki, bu məsələdə də xüsusi həssas davranıb, onları qorumalıyıq. İstər dövlət idarəçiliyində, istər ailəmizdə, cəmiyyətimizdə yaşlı nəsil bizim yol göstərənimiz, müdrik insanlarımızdır. Bundan əlavə, dövlətimizin başçısının həyata keçirdiyi islahatlar kursu fonunda və ilk olaraq ölkə başçımızın Fonda ianə etdiyi bir vaxtda rəsmi şəxslərin, iş adamlarının, ictimai fiqurların, müxtəlif müəssisə və təşkilatların, ayrı-ayrı şəxslərin bu çağırışa qoşulması, Fonda vəsait köçürmələri və belə çətin günlərdə həmrəy olmaları həm də onu göstərir ki, ölkə başçımızın rəhbərliyi altında artıq Azərbaycanda yeni model formalaşır. İdarəçilikdən daha çox xidmət modelinə fokuslanan bu yeni model də birbaşa vətəndaş mərkəzli siyasətə xidmət edir”.
Bölmənin digər xəbərləri
