Şəhid Muxtar Qasımlının xatirəsinə həsr olunmuş şahmat turnirinin qalibləri mükafatlandırılıb
Bakı, 30 iyun, AZƏRTAC
Şəhid Muxtar Qasımlının xatirəsinə həsr olunmuş şahmat turnirinin qalibləri mükafatlandırılıb.
Tədbir Suraxanı rayon İcra Hakimiyyəti, Bakı Şəhər Gənclər və İdman Baş İdarəsi (BŞGİBİ) və “İDEA” şahmat klubunun birgə təşkilatçılığı ilə həyata keçirilib. Tədbirdə Suraxanı Rayon İcra Hakimiyyətinin başçısı Əziz Əzizov, Yeni Azərbaycan Partiyası Suraxanı rayon təşkilatının sədri Vüqar Seyidov, İcra Hakimiyyəti Vətən Müharibəsi iştirakçıları və şəhid ailələri ilə işin təşkili şöbəsinin müdiri Elmar Hüseynov, Bakı Şəhər Gənclər və İdman Baş İdarəsinin rəisi Raqif Abbasov iştirak ediblər.
BŞGİBİ-dən AZƏRTAC-a bildiriblər ki, tədbir Muxtar Qasımlının evində təşkil edilib və yeniyetmə turnir iştirakçıları şəhidin əziz xatirəsinə ayrılmış guşə ilə tanış olublar.
Turnirin keçirilməsini yaddaqalan hadisə kimi dəyərləndirən rayon icra hakimiyyətinin başçısı Əziz Əzizov deyib: “Düşünürəm ki, belə silsilə tədbirlərin keçirilməsi davam etdirilməlidir. Çünki Müzəffər Ali Baş Komandanın başçılığı altında ordumuz 44 gün ərzində dünya tarixində görülməmiş şücaət göstərib. Biz bu igidlərimizi də heç vaxt unutmayacayıq. Həmişə biz onların valideynlərinin yanında olmalıyıq ki, onlar dövlətin qayğısını yaxından hiss etsinlər. Cənab Prezidentin Sərəncamı ilə bu gün bu ailələrin sosial vəziyyətinin yaxşılaşdırılması üçün tək Suraxanı rayonunda 50-ə yaxın şəhid ailəsi və qazilərimiz evlə təmin olunub. Digər sosial qayğılar həyata keçirilir. Allah bütün şəhidlərimizə rəhmət eləsin”.
Yarışın böyük marağa səbəb olduğunu söyləyən Bakı Şəhər Gənclər və İdman Baş İdarəsinin rəisi Raqif Abbasov deyib ki, belə yarışların davamlı şəkildə təşkilinə çalışmalıyıq: “Biz şəhid və qazilərimizə borcluyuq. Şəhid ailələri gözümüzün nurudur. Allah bütün şəhidlərimizə rəhmət eləsin”.
Belə turnirlərin şəhidlərimizin xatirəsini anmaq, yaşatmaq, uca tutmağa xidmət etdiyini bildirən Yeni Azərbaycan Partiyası Suraxanı rayon təşkilatının sədri Vüqar Seyidov deyib ki, şəhidlərimiz böyük, şanlı bir tarix yazıblar: “Bizim bir azərbaycanlı olaraq şəhidlərimizin adlarını uca tutmaq, onların ailələrinin yanında olmaq borcumuzdur. Bir daha bu tədbirin təşkilatçılarına öz təşəkkürümü bildirirəm. Allah şəhidlərimizə rəhmət eləsin”.
Qeyd olunub ki, şəhid Muxtar Qasımlı Azərbaycan Silahlı Qüvvələrinin baş leytenantı olaraq şərəfli döyüş yolu keçib. O, İkinci Qarabağ müharibəsi zamanı Füzuli istiqamətində gedən döyüşlərdə qəhrəmancasına şəhid olub.
Sonra turnirin qalibləri şəhid Muxtar Qasımlının ailə üzvləri tərəfindən mükafatlandırılıblar.
Tədbirin sonundan Bakı Şəhər Gənclər və İdman Baş İdarəsinin rəisi Raqif Abbasov tərəfindən şəhid Muxtar Qasımlının ailə üzvlərinə bayraq hədiyyə olunub.
Bölmənin digər xəbərləri
