Bakı, 19 yanvar, AZƏRTAC

Dövlət Gömrük Komitəsi Tibbi Xidmət İdarəsinin rəisi, tibb xidməti general-mayoru Ceyhun Məmmədovun rəhbərliyi ilə Mərkəzi Gömrük Hospitalının əməkdaşları paytaxtın “20 Yanvar” dairəsində şəhidlərin xatirəsinə ucaldılan abidə kompleksini ziyarət ediblər.

Komitədən AZƏRTAC-a bildirilib ki, nümayəndə heyəti kompleksin önünə tər qərənfillər düzüb, şəhidlərin xatirəsini hörmət və ehtiramla anıblar.

Qeyd edilib ki, 1990-cı il yanvarın 20-si müasir tariximizin faciəli olmaqla bərabər, həm də qəhrəmanlıq səhifəsidir. Otuz üç il əvvəl yanvarın 19-dan 20-nə keçən gecə SSRİ Silahlı Qüvvələrinin müxtəlif qoşun növlərindən formalaşdırılan hərbi birləşmələr paytaxt Bakıya yeridildi. 1990-cı il 20 Yanvar hadisələri zamanı keçmiş sovet ordusunun hərbi hissələri Bakıda öz suverenliyini əldə etmək üçün ayağa qalxan dinc əhaliyə qarşı misli görünməmiş qətliam törətdi. Bu terror Azərbaycan xalqına qarşı, insanlığa qarşı, bəşəriyyətə qarşı törədilmiş ən ağır cinayət idi. Həmin gecə yüzlərlə gəncin arzuları puç oldu, heç kimə rəhm edilmədi, uşaqlar, yaşlı insanlar qanlarına qəltan edildi. Azərbaycanın ərazi bütövlüyünü hədəf seçən erməni separatçılığına və onlara dəstək verən qüvvələrə dinc şəkildə etiraz edən insanlara divan tutan cəza maşını azərbaycanlıların qəlbindəki azadlıq duyğularını öldürə bilmədi. Onlar Vətən, torpaq uğrunda canlarından keçdilər, ölümsüzlüyə qovuşdular, şəhidlik zirvəsinə ucaldılar. Qanlı Yanvar şəhidləri heç zaman unudulmayacaq. Şəhidlərimizin əziz xatirəsi hər bir azərbaycanlının qəlbində daim yaşayacaq.

Xatırladaq ki, “20 Yanvar” dairəsində şəhidlərin xatirəsinə ucaldılan abidə kompleksi Prezidenti İlham Əliyevin göstərişi ilə inşa edilib. Memarı Ədalət Məmmədov, heykəltaraşları Cavanşir Dadaşov və Azad Əliyev olan bu abidə-kompleks 1990-cı il yanvarın 19-dan 20-nə keçən gecə Bakıda törədilmiş faciənin qurbanlarının xatirəsini əbədiləşdirmək üçün ucaldılıb. Abidə kompleksinin üzərində 20 Yanvar faciəsi zamanı həlak olmuş 147 nəfərin adı və soyadı, eyni zamanda, Ümummilli Lider Heydər Əliyevin "1990-cı il yanvarın 20-si Azərbaycanın tarixinə ən faciəli günlərdən biri, xalqımızın qəhrəmanlıq səhifəsi kimi daxil olmuşdur" sözləri qızılı hərflərlə həkk olunub.