Serbiya Birləşmiş Ərəb Əmirlikləri ilə süni intellekt sahəsində əməkdaşlığa başlayıb
Belqrad, 18 iyun, AZƏRTAC
Serbiya Birləşmiş Ərəb Əmirlikləri ilə süni intellekt sahəsində hərtərəfli əməkdaşlığa başlayıb.
AZƏRTAC xəbər verir ki, bu barədə Serbiya Prezidenti Aleksandar Vuçiç Əbu-Dabidə Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan ilə görüşünü şərh edərkən deyib.
Serbiya Prezidenti qeyd edib ki, ölkəsi ilə Birləşmiş Ərəb Əmirlikləri arasında müxtəlif sahələrdə çox geniş əməkdaşlıq mövcuddur.
O, görüşdə, həmçinin hərbi-texniki əməkdaşlığın dərinləşdirilməsi, eləcə də müxtəlif iqtisadi layihələrin davam etdirilməsi məsələlərinin müzakirə olunduğunu bildirib.
Aleksandar Vuçiç Birləşmiş Ərəb Əmirliklərinin Prezidentindən Serbiyaya yüksək texnologiyalar, xüsusilə də hərbi texnologiyalar sahəsində köməklik göstərməsini xahiş edib.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
