Şərqşünaslıq İnstitutu Beynəlxalq Yunus Əmrə Simpoziumu keçirəcək
Bakı, 22 iyun, AZƏRTAC
Görkəmli türk şairi Yunus Əmrənin vəfatının 700-cü ildönümü münasibətilə 2021-ci il UNESCO tərəfindən “Yunus Əmrə İli” elan edilib. Bu münasibətlə AMEA akademik Ziya Bünyadov adına Şərqşünaslıq İnstitutu Mehmet Akif Ərsoy Vəqfi ilə birgə iyulun 16-da Beynəlxalq Yunus Əmrə Simpoziumu keçirəcək.
Bu barədə AZƏRTAC-a Şərqşünaslıq İnstitutundan məlumat verilib. Bildirilib ki, beynəlxalq simpoziuma məruzələrin tezisləri “Yaşadığı dövrdən günümüzə Yunus Əmrə təsiri”, “Dünya ədəbiyyatında Yunus Əmrə”, “Yunus Əmrənin Türk ədəbiyyatında yeri və önəmi”, “Türk yazı dilinin formalaşamsında Yunus Əmrənin rolu”, “Türk mədəniyyəti və Yunus Əmrə”, “Yunus Əmrə və təsəvvüf ədəbiyyatı”, “Yunus Əmrə və dil (dilçilik)”, “Yunus Əmrə və musiqi” mövzuları üzrə qəbul edilir.
Simpoziuma məruzələrin tezisləri iyunun 26-dək qəbul olunur. İyunun 30-da isə xülasələr elan ediləcək. Məruzələrin tam mətni çap olunmaq üçün avqustun 15-nə kimi [email protected] ünvanına göndərilməlidir.
Simpoziuma məruzələr Azərbaycan, türk, rus və ingilis dillərində qəbul edilir. Məruzələrin qəbulu ilə bağlı qaydalar Şərqşünaslıq İnstitutunun orientalstudies.az ünvanında dərc edilib.
Bölmənin digər xəbərləri
