Siyasi şərhçi: Sosial inteqrasiyanın genişlənməsi Türk dünyasının vahid strateji xəttini daha da gücləndirir
Bakı, 26 noyabr, Səbinə Əlizadə, AZƏRTAC
Naxçıvanda Türk Dövlətləri Təşkilatına (TDT) üzv ölkələrin qeyri-hökumət təşkilatlarının həmrəylik forumunun keçirilməsi türk dünyasında inteqrasiya proseslərinin sosial dayaqlarının daha da möhkəmləndiyini göstərir.
Bu barədə AZƏRTAC-a açıqlamasında siyasi şərhçi Ülviyyə Zülfiqar bildirib.
Onun sözlərinə görə, forumun məhz Azərbaycanda – Türk dünyasının ən sabit və strateji ölkələrindən birində təşkil olunması Bakının türkdilli dövlətlər arasında əlaqələndirici rola malik olduğunu bir daha təsdiqləyir. “Azərbaycan bu platformalarda təkcə iştirakçı deyil, prosesləri sistemli şəkildə yönəldən aparıcı dövlət kimi çıxış edir. Həm coğrafi mövqeyi, həm siyasi sabitliyi, həm də regional təşəbbüsləri ilə türk inteqrasiyasına real dinamika qazandırır”, - deyə şərhçi vurğulayıb.
Ülviyyə Zülfiqar qeyd edib ki, Naxçıvanda keçirilən tədbir Türk dünyasının genişlənən əməkdaşlıq konturlarını nümayiş etdirir. Onun fikrincə, yaradılan hər yeni platforma – istər dövlət rəsmilərinin toplantıları, istər ekspert görüşləri, istərsə də QHT müstəvisində həmrəylik tədbirləri türk dövlətləri arasında çoxşaxəli təmasları gücləndirir. “Belə görüşlərin sayı nə qədər çoxalsa, Türk dünyasının siyasi və ictimai aktorlarının qarşılıqlı əlaqəsi bir o qədər intensivləşir. Bu isə vahid strateji vizyonun formalaşmasına mühüm töhfə verir”, - deyə ekspert bildirib.
Siyasi şərhçi türkdilli dövlətlərin inteqrasiyasının dərin tarixi və mədəni bağlılıqlara söykəndiyini bildirib. Onun sözlərinə görə, bu fonda dövlətlər arasında siyasi, iqtisadi, mədəni və digər sahələrdə həyata keçirilən layihələrin coğrafiyası genişlənir, əməkdaşlıq səviyyəsi isə yüksəlir. “Türk xalqları arasında qardaşlıq münasibətləri real və davamlı əməkdaşlıq mexanizmlərinə çevrilir. Bu proses artıq yalnız ideoloji deyil, həm də praktiki və institusional çərçivədə inkişaf edir”, - deyə Ü.Zülfiqar vurğulayıb.
Siyasi şərhçinin sözlərinə görə, türk dövlətlərinin istənilən platformada bir araya gəlməsi təkcə regional əməkdaşlıq üçün deyil, həm də daha geniş geosiyasi düzən üçün müsbət dinamika yaradır. O qeyd edib ki, Naxçıvandakı forum türk birliyinin gücləndirilməsi istiqamətində Azərbaycanın ardıcıl fəaliyyətinin növbəti göstəricisidir. “Azərbaycan həm təşkilatçı, həm təşəbbüskar, həm də aparıcı iştirakçı dövlət kimi yeni geosiyasi arxitekturanın formalaşmasına mühüm töhfə verir”, – deyə o əlavə edib.
Siyasi şərhçi sonda vurğulayıb ki, türk dövlətlərinin müxtəlif sahələrdə birləşməsi yalnız region daxilində deyil, bütövlükdə Avrasiya məkanında əməkdaşlığın yeni mərhələsini formalaşdırır. “Bu prosesdə Azərbaycan əsas dayaqlardan biri olaraq qalır və türkdilli dövlətlərin sosial, siyasi və iqtisadi inteqrasiyasının güclənməsinə ardıcıl şəkildə töhfə verir”, – deyə Ülviyyə Zülfiqar qeyd edib.
Bölmənin digər xəbərləri
