Son 3 ildə Qəbələdə 11 turizm obyekti tikilmişdir
Qəbələ, 4 fevral (AZƏRTAC). Qəbələ rayonunda turizm potensialının inkişafına xüsusi əhəmiyyət verilir.
Qəbələ rayon mədəniyyət və turizm şöbəsinin müdiri Nargilə Qafarova AZƏRTAC-a bildirmişdir ki, son illər Qəbələdə sosial-iqtisadi infrastrukturun sürətli inkişafı və yenilənməsi regionun turizm potensialının daha da güclənməsinə, turistlər üçün cəlbediciliyin artmasına, müxtəlif xarakterli böyükmiqyaslı işgüzar görüşlərin, konfransların keçirildiyi bir mərkəzə çevrilməsinə səbəb olmuşdur. Bütün bu amillər Qəbələnin turizm sektorunun investisiyalar üçün cəlbediciliyini daha da artırır. Ötən üç il ərzində Qəbələdə 11 yeni turizm obyekti tikilərək istifadəyə verilmişdir. Bu siyahıya iki 5 ulduzlu, iki 4 ulduzlu, iki sanatoriya və 7 üçulduzlu otel daxildir. ”Turizm ili”ndə daha 3 belə obyektin inşası başa çatdırılacaqdır.
Zəngin və qədim tarixə, füsunkar təbiətə malik olan Qəbələyə istirahət etmək üçün gələn yerli və xarici turistlərin sayı da ilbəil artmaqdadır. Belə ki, ötən il Qəbələyə 30 min 450 turist səfər etmişdir. Onlardan 26 min 124-ü yerli, 4326 nəfəri isə xarici vətəndaşdır. Rayonda turizmin inkişafi nəticəsində 2 mindən çox yerli sakin işlə təmin olunmuşdur. Hazırda Qəbələdə fəaliyyət göstərən obyektlər yay turizmi üçün nəzərdə tutulmuşdur. Lakin bölgənin qış mövsümündə də turizm mərkəzinə çevrilməsi planları mövcuddur.
Bölmənin digər xəbərləri
