SİYASƏT
“SOYDAŞLARIMIZI AZƏRBAYCANIMIZ NAMİNƏ SIX BİRLƏŞMƏYƏ ÇAĞIRIRAM”
Dünya azərbaycanlılarının həmrəyliyi günü ərəfəsində AZƏRTAC-ın xüsusi müxbiri Fransadakı Azərbaycan icmasının fəal üzvlərindən biri, 85 yaşlı Qədir Süleymanla görüşərək ondan müsahibə almışdır. Qocaman həmyerlimiz demişdir:
-Altmış ilə yaxındır Fransada yaşayıram. Vətənimizlə bağlı ötən illərin bəzi məqamları yaddaşımda həmişəlik iz salıbdır. Xatirimdədir ki, ötən əsrin 70-ci illərinin əvvəllərində SSRİ-dən böyük bir qrup mədəniyyət və incəsənət işçisi Fransaya gəlmişdi. Onların arasında mərhum bəstəkarımız Qara Qarayev, maestro Niyazi və balet ustaları da var idi. Parisin ən böyük konsert salonlarından birində “Yeddi gözəl” baleti göstərildi. Dirijor Niyazi idi. Balet fransızlara o dərəcədə güclü təsir buraxmışdı ki, onlar tamaşadan sonra xəritədə Azərbaycanı axtarır, belə yüksək səviyyəli baletin vətəni ilə maraqlanırdılar.
Bu bir həqiqətdir ki, o dövrlərdə ölkəmizi tanıyan fransızları barmaqla saymaq olardı. İndi isə zaman dəyişib. Azərbaycan müstəqil dövlətdır. Dünyanın tanınmış dövlət xadimlərindən biri olan cənab Heydər Əliyevin apardığı siyasət nəticəsində Azərbaycan təkcə Fransada deyil, bütün cahanda tanınır. Prezidentimiz Heydər Əliyevin təşəbbüsü və fərmanı ilə “Dünya azərbaycanlılarının həmrəyliyi günü”nün təsis edilməsi ölkəmizin varlığını və tarixini bütün məmləkətlərə agah etmişdir.
Yarım milyondan artıq erməninin yaşadığı və onların lobbisinin güclü olduğu Fransada Azərbaycan həqiqətlərini ictimaiyyətə çatdırmaq bir qədər çətindir. Buna baxmayalraq, Vətənimizdə aparılan iqtisadi və demokratik islahatlar, erməni təcavüzünün əsl mahiyyəti, doğma torpaqlarından silah gücünə çıxarılmış bir milyondan artıq qaçqın və məcburi köçkünün çadır şəhərciklərində məskunlaşması barədə xəbərləri icmamızın üzvləri Fransa ictimaiyyətinə çatdırmaq üçün əlindən gələn hər şeyi edirlər. Bu sahədə Fransadakı səfirliyimiz bizə yaxından kömək göstərir, lazımi ədəbiyyatla təmin edir.
Ötən ilin noyabr ayında Bakıda Dünya azərbaycanlılarının qurultayının keçirilməsi, ölkəmizin Prezidenti Heydər Əliyevin fərmanı ilə Xaricdə Yaşayan Azərbaycanlılarla İş üzrə Dövlət Komitəsinin yaradılması Vətənimizin bizə - xaricdə yaşayan azərbaycanlılara böyük qayğısının təcəssümüdür.
Azərbaycanı dünyada tanıtmaq üçün hələ çox işlər görməliyik. İlk növbədə tariximizə dair əcnəbi dillərdə sanballı kitablar nəşr olunmalı, mədəniyyət və incəsənət ustalarının xarici ölkələrə tez-tez səfərləri təşkil edilməli, müxtəlif mövzularda sərgilər nümayiş olunmalıdır.
Vətəndən uzaq bir ölkədə yaşasam da, azərbaycanlı olduğumla fəxr edir və fürsət düşmüşkən, bütün soydaşlarımızı Azərbaycanımız naminə sıx birləşməyə çağırıram.
Əsgər Əliyev
AZƏRTAC-ın xüsusi müxbiri
Paris