Sudan ordusu paytaxtda bir neçə hökumət binasına nəzarəti ələ alıb
Qahirə, 21 mart, AZƏRTAC
Sudan ordusu Respublika Sarayında üsyançı Çevik Dəstək Qüvvələrinin şəxsi heyətini və texnikasını məhv edib, onların silahlarını müsadirə edib və Xartumun mərkəzindəki nazirlik binalarına nəzarəti ələ alıb.
AZƏRTAC Sudan Xəbər Agentliyinə istinadla bildirir ki, ordu komandanlığı bu gün verdiyi bəyanatda Respublika Sarayının azad edilməsini tarixi məqam adlandırıb.
Bəyanatda qeyd olunur ki, geri çəkilən Çevik Dəstək Qüvvələri “psixoloji və mənəvi cəhətdən çöküb”. Bildirilir ki, sakinlər Bəhri, Şərqi Nil və Omdurmana geri qayıda bilərlər. Xartum hava limanı tezliklə fəaliyyətini bərpa edəcək.
Eyni zamanda, Sudanın təhlükəsizlik qüvvələrinin komandanlığı geri çəkilməkdə olan üsyançılar tərəfindən Xartumda Prezident Sarayına dron hücumu nəticəsində 3 nəfərin həlak olduğu, bir neçə şəxsin yaralandığı barədə məlumat yayıb. Ölənlər Sudan Televiziyasının əməkdaşlarıdırlar.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
