Sumqayıtlılar 20 Yanvar hadisələri zamanı şəhid olmuş alimlərin xatirəsini anmışlar
Sumqayıt, 21 yanvar (AZƏRTAC). Bu günlər Azərbaycanın hər guşəsində 20 Yanvar şəhidlərinin anma mərasimləri keçirilir. Sumqayıt ictimaiyyətinin nümayəndələri də Azərbaycan alimləri Svetlana Məmmədova, İsmayıl Mursaqulov və İbrahim İbrahimovun faciəli surətdə həlak olduqları yeri ziyarət etmişlər. AMEA-nın Sumqayıtda yerləşən Polimer Materiallar İnstitutunda işləyən bu üç alim 1990-cı il yanvarın 24-də avtomobillə işdən evə qayıdarkən qətlə yetirilmişdilər.
Ceyranbatan su anbarının yanında, Bakı-Quba magistralının 24-cü kilometrliyində sovet ordusunun zirehli maşınları onların avtomobilini vəhşicəsinə əzib keçmişdir. Faciə yerində alimlərin xatirəsini əbədiləşdirən abidə ucaldılmışdır.
Dinc peşə nümayəndələri olan alimlərimiz yüzlərlə həmvətənimiz kimi hərc-mərcliyin, silahsız adamlara misli görünməmiş amansızlıqla dəhşətli divan tutmuş hərbi cinayətkarların azğınlığının qurbanı olmuşlar.
Alimlərin abidə kompleksinin qarşısına al qərənfillər düzülmüş, şəhidlərimizin ruhuna dualar oxumuşdur.
Bölmənin digər xəbərləri
