“Suraxanı Oyl Opereyşın Kompani S.A.” şirkətində ekoloji tədbirlər planı uğurla yerinə yetirilir.
Bakı, 29 dekabr (AZƏRTAC). “Suraxanı Oyl Opereyşın Kompani S.A.” şirkətində ətraf mühitin yaxşılaşdırılması üzrə 2010-cu ildə nəzərdə tutulmuş ekoloji tədbirlər planı uğurla yerinə yetirilir.
AZƏRTAC xəbər verir ki, şirkətin istismarında olan mədən ərazisindəki ayrı-ayrı quyuların və digər qurğuların ətrafından 521 kubmetr sənaye axıntı suları yığılaraq təmizlənməsi və zərərləşdirilməsi üçün “Ekol Mühəndislik Xidmətləri” QSC-yə təhvil verilmişdir. Mədən ərazisindəki müxtəlif ölçülü gölməçələrin mərhələli şəkildə ləğv olunması işi davam etdirilməkdədir.
Cari ilin 10 ayında işlək fondda olan 9 quyunun işçi meydançası və ətrafları uzun müddət atılıb qalan tullantılardan təmizlənmiş, onların quyuağzı hissəsində çirkləndiricilərin yığılması üçün xüsusi anbarlar inşa edilmiş və ətrafları müasir tələblərə uyğun olaraq abadlaşdırılmışdır. 70 ildən artıq istismarda olan, lakin bu müddətdə əsaslı təmir olunmadığı üçün yararsız vəziyyətə düşən yeddinci qovşaqda təmizlik və bərpa işləri aparılmışdır.
Bölmənin digər xəbərləri
