Şuşanın azad olunması Prezident İlham Əliyevin Zəfər zirvəsidir
Bakı, 23 dekabr, AZƏRTAC
Bu gün qalib Azərbaycanın uğurlarından bəhs edirik. Hər bir uğur böyük səylərin, qətiyyətin, möhkəm təmələ əsaslanan siyasətin nəticəsidir. Son 19 ildə Ulu Öndər Heydər Əliyevin siyasətini bütün sahələrdə uğurla davam etdirən, Azərbaycanı ən yüksək zirvələrə yüksəldən Prezident İlham Əliyev 2020-ci il noyabrın 8-də xalqa müraciətində bu fikirləri böyük qürur hissi ilə qeyd etdi: “Mən bu gün Ulu Öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Bu gün şəhidlərimizin, Ulu Öndərin ruhu şaddır! Gözün aydın olsun Azərbaycan! Gözünüz aydın olsun dünya azərbaycanlıları!”
Müasir, müstəqil Azərbaycan dövlətinin qurucusu, Ulu Öndər Heydər Əliyev 2003-cü il oktyabrın 1-də xalqa tarixi müraciətində Azərbaycanın uğurlu gələcəyi naminə növbəti inamın ünvanını göstərərək bu əminliyi ifadə etmişdir ki, ona özüm qədər inanıram və gələcəyinə böyük ümidlər bəsləyirəm. Həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. Axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir.
Dövlətimizin başçısı İlham Əliyev 19 illik Prezidentlik dövrünün hər gününü Azərbaycan xalqının tarixinə uğur səhifəsi kimi yazdı. Dövlətinin, xalqının gələcəyini düşünən, imzalar arasında xalqının imzasının görünməsindən böyük qürur hissi keçirən lider daim yeni-yeni hədəflərin müəyyənləşdirilməsinə və onlara çatmağa səy göstərir. Müasir, müstəqil Azərbaycan dövlətinin qurucusu, Ulu Öndər Heydər Əliyev adını tarixə müstəqilliyimizin, onun layiqli davamçısı, Prezident İlham Əliyev isə torpaqlarımızın xilaskarı, qalib sərkərdə kimi qızıl hərflərlə yazdı.
AZƏRTAC xəbər verir ki, bu fikirləri Milli Məclisin deputatı Malik Həsənov bildirib.
Deputat qeyd edib ki, Prezident İlham Əliyev fəaliyyəti ilə dövlət siyasətinin müasir modelini təqdim edib. Yürütdüyü siyasət müasir Azərbaycanın güclənməsinə, milli-mənəvi dəyərlərimizin ən yüksək səviyyədə qorunmasına xidmət edir. Dünyada tolerantlıq məkanı kimi tanınan Azərbaycan dövlətimizin başçısı İlham Əliyevin xidmətləri sayəsində mədəniyyətlərarası və sivilizasiyalararası dialoq məkanı kimi tanınır.
Bu gün Azərbaycanın tarixi Zəfərindən bəhs ediriksə, Ümummilli Lider Heydər Əliyevin müstəsna xidmətləri sayəsində formalaşan və inkişaf edən Azərbaycan Silahlı Qüvvələrinin Müzəffər Ali Baş Komandanı İlham Əliyevin rəhbərliyi ilə öz xalqına Qələbəni bəxş etmiş müzəffər Orduya çevrildiyini xüsusi qeyd etməliyik. Məhz 2003-cü ildən etibarən ordu quruculuğu məsələləri dövlət siyasətinin prioriteti kimi müəyyən olundu. Ardıcıl şəkildə görülmüş işlər Azərbaycan Ordusunu dünyanın ən güclü 50 ordusu sırasına yüksəltdi. Ötən dövrdə Silahlı Qüvvələrin maddi-texniki təchizatının yenilənməsi, müasir infrastrukturun yaradılması, hərbi qulluqçuların sosial müdafiəsi, mənzil təminatının yaxşılaşdırılması, həmçinin müdafiə sənayesinin inkişaf etdirilməsi Prezident İlham Əliyevin həyata keçirdiyi siyasətin əsas tərkib hissələrindən oldu. Azərbaycan Silahlı Qüvvələri Müzəffər Ali Baş Komandan İlham Əliyevin rəhbərliyi ilə 44 gün davam edən Vətən müharibəsində tarixi Zəfərə imza atdı. Dünya hərb tarixinə yeni səhifə yazan Ordumuzun göstərdiyi şücaət, qəhrəmanlıq hər birimizi qürurlandırır. Ermənistanın otuz ilə yaxın bir dövrdə işğal etdiyi ərazilərdə minalarla və digər vasitələrlə mürəkkəb maneələr yaratmasına baxmayaraq, 44 gündə Ordumuzun 5 şəhəri, 4 qəsəbəni, 300-ə yaxın yaşayış məntəqəsini işğaldan azad etməsi torpaq, Vətən sevgisinin ən yüksək səviyyədə nümayişi idi. Azərbaycanın hərbi-siyasi Qələbəsinin və Ermənistanın kapitulyasiyasının təsdiqi olan 2020-ci il 10 noyabr tarixli Bəyanatına əsasən Kəlbəcər, Ağdam və Laçın döyüşsüz Azərbaycana qaytarıldı. Bu mühüm məqamı xüsusi qeyd etməliyik ki, ölkənin 30 ilə yaxın pozulmuş ərazi bütövlüyünün bərpası və xalqımızın mədəniyyət beşiyi hesab olunan Şuşanın azad olunması Prezident İlham Əliyevin Zəfər zirvəsidir.
Həmin tarixlərdə dövlətimizin başçısı, Müzəffər Ali Baş Komandan İlham Əliyevin və birinci xanım Mehriban Əliyevanın işğaldan azad edilmiş ərazilərimizə səfərləri dünyaya bir daha bu mesajı çatdırır ki, bu torpaqlar bizimdir və biz burada əbədi olacağıq. Dövlətimizin başçısı İlham Əliyev ötən il doğum günündə Şuşanın məşhur Cıdır düzündən çıxış edərkən bu mesajı çatdırdı: “Bu gün biz azad Qarabağdayıq. Bu gün biz azad Zəngəzurdayıq. Biz - bu torpaqların sahibləri bu torpaqlara qayıtmışıq və bundan sonra biz bu torpaqlarda əbədi yaşayacağıq. Azərbaycan xalqının mənim sözlərimə inamı məni daha da çox inandırırdı ki, biz buna nail olacağıq. Xalqımız birləşdi, bir amal uğrunda, bir müqəddəs ideya uğrunda birləşdi və istədiyinə nail oldu”.
Prezident İlham Əliyevin həyatındakı əlamətdar, sevincli günləri hər zaman xalqı ilə bölüşdüyünü deyən deputat bildirib ki, dövlətimizin başçısının tarixi Zəfərimizdən dərhal sonra işğaldan azad edilmiş ərazilərə səfəri, doğum günlərində məcburi köçkünlərlə və şəhid ailələri ilə görüşməsi də bunun təsdiqidir. Dövlətimizin başçısı bu cür əlamətdar günlərdə şəhid ailələri üçün inşa edilmiş yeni evlərin açılışlarında, habelə yeni salınmış köçkün qəsəbələrində insanlarla görüşür. 50 illiyini məcburi köçkünlərlə bərabər Ağcabədidə qeyd edən Prezident İlham Əliyev ötən il 60 illiyini də Qarabağda - Azərbaycanın döyünən ürəyi, türk dünyasının mədəniyyət paytaxtı Şuşada keçirdi və bu məkandan belə bir çağırışı səsləndirdi: “Sizi əmin etmək istəyirəm ki, bundan sonra da eyni əzmkarlıqla, eyni qətiyyətlə ölkə maraqlarının keşiyində duracağam, sizin dəstəyinizlə biz yeni böyük uğurlara imza atacağıq".
Bölmənin digər xəbərləri
