Tanınmış həmvətənimiz Oleq Krapivin Ukrayna Mədəniyyət Nazirliyinin fəxri fərmanı ilə təltif edilmişdir
Kiyev, 24 noyabr (AZƏRTAC). Tanınmış həmvətənimiz, əfsanəvi idmançı və mesenat Oleq Andreyeviç Krapivin Ukrayna-Azərbaycan mədəni münasibətlərinin inkişafına və möhkəmlənməsinə şəxsi töhfəsinə, yüksək peşəkarlığına görə Ukrayna Mədəniyyət və Turizm Nazirliyinin fəxri fərmanına layiq görülmüşdür.
Ukraynanın mədəniyyət və turizm naziri Mixail Kulinyaki adından mükafatı Oleq Krapivinə nazir müavini Timofey Koqan təqdim etmişdir.
AZƏRTAC-ın xəbər verdiyi kimi, Oleq Krapivin Heydər Əliyev adına Ukrayna-Azərbaycan Təhsil, Elm, Mədəniyyət və İdman Mərkəzinin təsisçisi, Ukrayna Azərbaycanlıları Konqresinin Kiyev şəhər təşkilatının sədri, Azərbaycanın və keçmiş SSRİ-nin Əməkdar İdman Ustası, sərbəst güləş üzrə Əməkdar Məşqçidir.
Onu da xatırladaq ki, Oleq Krapivin 37 nömrəli Kiyev orta ümumtəhsil məktəbində Azərbaycan dili sinfinə, Kiyevdə fəaliyyət göstərən “Azərbaycan” musiqili-xoreoqrafiya ansamblına, sərbəst güləş üzrə uşaq-gənclər məktəbinə və s. sponsorluq edir.
Zeynal Ağazadə
AZƏRTAC-ın xüsusi müxbiri
Kiyev
######
Bölmənin digər xəbərləri
