Tarix yazan Liderin imzası: Güclü lider - Güclü Azərbaycan
Bakı, 28 may, AZƏRTAC
Müstəqil Azərbaycanın son iki onillikdə keçdiyi möhtəşəm inkişaf yolu bir liderin – Prezident İlham Əliyevin müdrik siyasəti, dönməz iradəsi və uzaqgörən qərarları ilə sıx bağlıdır. Prezident İlham Əliyev təkcə dövlət başçısı deyil, həm də xalqın taleyində mühüm dönüş yaradan tarixi şəxsiyyət, milli yaddaşda öz imzasını əbədi olaraq həkk etmiş Liderdir.
Bu imza – Zəfərimizin altındadır. Bu imza – sabitliyin, inkişafın və dövlətçiliyin təməlindədir. Bu imza – hər bir azərbaycanlının qürur mənbəyidir.
Bunu AZƏRTAC-a açıqlamasında “İMZA” Sosial İnkişafa Dəstək İctimai Birliyinin sədri Xəyyam Əsgərov deyib.
O qeyd edib ki, 2020-ci ildə Vətən müharibəsində qazanılmış tarixi Qələbə, heç şübhəsiz, xalqımızın birliyinin, Ordumuzun şücaətinin və Prezident İlham Əliyevin sarsılmaz liderliyinin təntənəsidir. Bu Qələbə ilə təkcə torpaqlarımız azad edilmədi, həm də milli qürurumuz, tarixi ədalət və suverenliyimiz bərpa olundu. Zəfərin siyasi, hərbi və mənəvi memarı məhz Prezident İlham Əliyevdir. O, bu tarixin müəllifidir.
İşğaldan azad olunmuş ərazilərimizdə artıq yeni bir həyat başlayıb. Ağıllı kəndlər salınır, müasir infrastruktur qurulur, yollar, məktəblər, xəstəxanalar, sənaye zonaları ardıcıl şəkildə istifadəyə verilir. Prezidentin rəhbərliyi ilə həyata keçirilən bu bərpa və quruculuq prosesi, əslində, yeni Azərbaycanın, yenidən doğulan Qarabağın gələcəyinin altına atılan yeni bir imzadır.
Bu baxımdan Laçın Beynəlxalq Hava Limanının açılışı, sadəcə, mühüm bir nəqliyyat layihəsi deyil, həm də dövlətimizin gücünün, iradəsinin və strateji baxışının rəmzidir. Çətin dağlıq ərazidə tikilən bu hava limanı – Qayıdışın, İnkişafın və Suverenliyin göylərə yüksələn simvoludur. Laçın səmasında süzülən hər bir təyyarə, əslində, bir xalqın qələbəsini, bir liderin imzasını daşıyır.
“Prezident İlham Əliyevin siyasi kursu Azərbaycanın müstəqilliyini daha da möhkəmləndirmiş, ölkəmizi regionda və beynəlxalq aləmdə söz sahibi bir dövlətə çevirmişdir. Onun rəhbərliyi ilə Azərbaycan bu gün regionda sülh, təhlükəsizlik və əməkdaşlıq platformasına çevrilmişdir. Milli maraqları hər şeydən üstün tutan bu siyasət xalqın etimadına əsaslanır və bu etimadın təməlində Lider-Xalq birliyi dayanır.
Vətəndaş cəmiyyəti nümayəndələri olaraq, biz də bu inkişaf yolunun davamlı və dayanıqlı olması üçün üzərimizə düşən məsuliyyəti dərindən dərk edirik. Bu sabitliyin, bu uğurların əsasında bir şəxs – Prezident İlham Əliyev dayanır. Onun liderliyi Azərbaycanın gələcəyini təmin edən başlıca qüvvədir.
Böyük dövlətçilik təfəkkürü, prinsipial mövqeyi və daim yeniləşən strateji baxışı ilə Prezident İlham Əliyev bu gün təkcə Azərbaycanın deyil, bütün regionun siyasi mənzərəsini formalaşdıran aparıcı liderə çevrilib. Onun hər bir qərarı ölkəmizi daha da yüksəklərə aparır, dövlətçiliyimizi daha da gücləndirir.
Bu yolda Prezident İlham Əliyevlə çiyin-çiyinə addımlayan, Azərbaycanın birinci vitse-prezidenti Mehriban Əliyevanın da xidmətləri xüsusilə qeyd olunmalıdır. Onun humanitar, sosial və mədəni sahələrdəki fəaliyyətləri, beynəlxalq səviyyədə ölkəmizin nüfuzunun artmasında oynadığı rol əvəzsizdir. Mehriban xanım Əliyeva milli birliyin və mənəvi dəyərlərin qoruyucusu kimi bu tarixi imzanın tamamlayıcısıdır.
Bu gün tarixi dəyişən qərarların, böyük Qələbələrin və yüksəlişin arxasında bir imza dayanır. Bu, xalqın etimadını doğruldan, milli maraqları uca tutan, gələcəyi formalaşdıran Liderin – Prezident İlham Əliyevin imzasıdır. Bu imza – Güclü Liderin, Güclü Azərbaycanın imzasıdır!”, - deyə Xəyyam Əsgərov vurğulayıb.
Bölmənin digər xəbərləri
